მთავარი საქართველოეროვნული ნაკრები ელიტაში ადგილი შენარჩუნებულია – მსოფლიოს თასზე “უმცროსმა ბორჯღალოსნებმა” ბოლო წამებზე ფიჯის ნაკრები დაამარცხეს

ელიტაში ადგილი შენარჩუნებულია – მსოფლიოს თასზე “უმცროსმა ბორჯღალოსნებმა” ბოლო წამებზე ფიჯის ნაკრები დაამარცხეს

ავტორი კახა მიხანაშვილი
69 ნახვა

არგენტინაში მიმდინარე რაგბის მსოფლიოს 20-წლამდელთა ჩემპიონატზე საქართველოს ახალგაზრდულმა ნაკრებმა ელიტაში ადგილი შეინარჩუნა და მომავალ მსოფლიოს თასზე თამაშის უფლება დაიბევა.

ქართველებმა დრამატულ ორთაბრძოლაში ფიჯის 20-წლამდელთა ნაკრები ბოლო წამზე გატანილი ლელოთი 12-8 დაამარცხეს.

როსარიოში უხვი ნალექის გამო მორაგბეებს ბრძოლა ტალახიან და გუბეებიან მოედანზე მოუწიათ. ამ ყველაფერმა თამაშის ესტეტიურ მხარეს ჩრდილი მიაყენა.

პირველ ნახევარში ორივე გუნდის მცდელობის მიუხედავად ერთადერთი ლელო გავიდა.   მე-9 წუთზე ფიჯის გუნდის გარემარბმა მომომ იხეირა.  გარდასახვა კი მუნცმა ვერ გამოიყენა.

ფიჯიმ პირველი ნახევარი 5-0 მოიგო.

მეორე ტაიმში ქართველები მეტოქეს ეკვეთნენ, თუმცა ცუდი ამინდის გამო ბევრ შეცდომებს უშვებდნენ.  უშეცდომოთ არც ჩვენი მეტოქე გამოიყურებოდა. მართალია, ხელდახელ სწრაფ თამაშში ფიჯელები, როგორც თევზი წყალში ისე გრძნობდნენ თავს, სამაგიეროდ დერეფანში და შეკინებაში მოიკოჭლებდნენ.

54-ე წუთზე კუნძულელებმა ჯარიმის დარტყმის უფლება მოიპოვეს.  მათმა მგეზავმა მუნცმა, ამჯერად მიზანს უწია და გუნდი წინ 8-0 გაიყვანა.

საქართველოს ნაკრებმა რამდენიმე ცვლილება განახორციელა და ბოლო 20 წუთში სათამაშო და ტერიტორიულ უპირატესობასაც დაეუფლა. ერთ-ერთი ასეთი ხანგრძლივი იერიშისას “უმცროსმა ბორჯღალოსნებმა” საწადელს მიაღწიეს და ფიჯის ნაკრებს ლელო დაუდეს.  ლელოს ავტორი “არმაზის” მორაგბე  იოანე იაშაღაშვილი გახდა.  გარდასახვა თედო ბაჟანდაძემ იდეალურად შეასრულა და სხვაობა მინიმუმამდე დაიყვანა 7-8.

მატჩის უკანასკნელ წუთზე საქართველოს ნაკრებმა კარგი შეტევა განახორციელა. ფიჯელები თავს გულდაგულ იცავდნენ და გამარჯვების მოსაპოვებლად არც თავს, არც  ჯანს არ ზოგავდნენ.  ქართველების 22-ფაზიანი შეტევა ლელოთი მაინც დაგვირგვინდა. ფიჯელების ჩათვლის მოედანში ბურთი კვაჭმა ვანო კარკაძემ დაამიწა.  გახარებულ და ემოციებში მყოფმა ქართველებმა გამარჯვების ზეიმი დაიწყეს, რადგანაც ლელო ბოლო წამზე გავიდა.

გარდასახვა სიხარულიგან აღელვებულმა თედო აბჟანდაძემ ვერ გაიტანა, თუმცა ამაზე ნამდვილად არ უნერვიულია.

საბოლოოდ საქართველოს 20-წლამდელთა ნაკრებმა ფიჯის 12-8 მოუგო და ელიტაში ადგილი შეინარჩუნა.

“უმცროს ბორჯღალოსნებს”  მსოფლიოს თასზე ერთი თამაში დარჩათ გასამართი.   ქართველები მე-9 ადგილისათვის ორთაბრძოლაში იტალიას 22 ივნისს, შეერკინებიან და გასულ ჩემპიონატზე მოპოვებული მე-9 ადგილის შენარჩუნებას შეეცდებიან.

საქართველო 12:8 ფიჯი

15. თემურ ჭიჭინაძე (ჯიქი), 14. ოთარ ლაშხი (ლელო), 13. დემურ თაფლაძე (ლელო), 12. ლაშა ლომიძე (აია), 11. ზურა ქავთარაძე (ხარები), 10. თედო აბჟანდაძე (აია, კაპ.), 9. მიხეილ ალანია (არმაზი);
1. ლუკააზარიაშვილი (მონპელიე), 2. ლუკა ნიორაძე (ჯიქი), 3. გია ხარაიშვილი (რასინგ 92), 4. ლუკა გელაშვილი (არმია), 5. ვახტანგ ჯინჭარაძე (ჯიქი), 6. ბექა ყორიაული (ლელო), 7. კობა კოლოტაური (ლელო), 8. იოანე იაშაღაშვილი (არმაზი).

მარქაფა:
16. ვანო კარკაძე (ორიაკი), 17. ნიკა ღვალაძე (გრენობლი), 18. ზაურ თევდორაშვილი (ანგულემი), 19. ტატო გვიმრაძე (ხვამლი), 20. იოსებ გუშარაშვილი (ყოჩები), 21. გიორგი მარგალიტაძე (ლელო), 22. სანდრო მარგიანი (აკადემია), 23. ირაკლი სიმსივე (აია), 24. გივი ცინცაძე (არმაზი), 25. კოტე მარჯანიშვილი (არმაზი),26. პაატა ბურჭულაძე (ხარები), 27. დაჩი პაპუნაშვილი (არმია), 28. ლუკა ჭელიძე (ტულონი).
მთავარი მწვრთნელი: ილია მაისურაძე
ლელო: იაშაღაშვილი, კარკაძე
გარდასახვა: აბჟანდაძე

ფიჯი: ლელო – მომო
ჯარიმა: მუნცი

Georgian Rugby-ს ფოტო.

0 კომენტარი
0

მსგავსი პუბლიკაციები

დატოვეთ კომენტარი