მთავარი მსოფლიოევროპის ჩემპიონატი 2 ოქრო, 3 ვერცხლი, 1 ბრინჯაო – ევროპულ თამაშებზე საქართველოს სამბოს ნაკრები მედლებით დაიხუნძლა

2 ოქრო, 3 ვერცხლი, 1 ბრინჯაო – ევროპულ თამაშებზე საქართველოს სამბოს ნაკრები მედლებით დაიხუნძლა

ავტორი კახა მიხანაშვილი
347 ნახვა

ბელარუსის დედაქალაქ მინსკში მიმდინარე ევროპის მე-2 თამაშებზე საქართველოს სამბოს ნაკრებმა პირველ დღეს, ბრწყინვალე შედეგი დააფიქსირა.

ქართველმა სამბისტებმა 6 მედალი მოიპოვეს.  მათ საქართველოს ყულაბაში  2 ოქროს, 3 ვერცხლის და 1 ბრინჯაოს მედალი ჩააჩხრიალეს.

ევროპული თამაშების ჩემპიონი ვახტანგ ჩიდრაშვილი და დავით ლორიაშვილი გახდნენ.

57 კილოგრამ წონით კატეგორიაში მსოფლიოს 5-გზის ჩემპიონმა ჩიდრაშვილმა ფინალურ დაპირისპირებაში რუსი მოჭიდავე  საიან ხერტეკი ტაქტიკურ ბრძოლაში 1-0 დაამარცხა და ევროპულ თამაშებზე ოქროს მედალს დაეუფლა. 1/2 ფინალში ჩიდრაშვილმა  მასპინძელი ბელარუსი ულაძისლაუ ბურძი დამაჯერებლად 3:0 დაამარცხა.

100 კილოგრამში მოასპარეზე დავით ლორიაშვილმა გადამწყვეტი ბრძოლა ლატვიელ ვიქტორს რესკოსთან გამართა და 2-0 გაიმარჯვა.  საჩემპიონო მარათონში ლორიაშვილმა გზიდან რუსი ასლიმ ჩერკოსკულოვი და უკრაინელი ანდრეი ბოლობანი ჩამოიტოვა.

ფინალური ორთაბრძოლები მინდია ლილუაშვილმა, ნინო ოძელაშვილმა და ელენე ქებაძემ დასთმეს.

აღსანიშნავია ის ფაქტი, რომ 72 კილოგრამ წონით კატეგორიის ფინალში ნინო ოძელაშვილი  მასპინძელ ანჟელა ზილინსკაიასთა მაშინ როცა 2-0 იგებდა, ერთერთი ორთაბრძოლისას  ცუდათ დაეცა და ხელი ამოუვარდა.  ხალიჩაზე ნაკრების ექიმი ზურაბ კახაბიშვილი შევიდა და დახმარება იქვე აღმოუჩინა, რაც სამბოს წესებით დარღვევად ითვლება.  შესაბამისად  მსაჯებმა გამარჯვებულად მასპინძელი მოჭიდავე გამოაცხადეს.

ოძელაშვილმა ფინალამდე ორ მოჭიდავეს სძლია. 1/4 ფინალში ნინომ რუმინელ ლორენა-ალექსანდრა პოდელენცკის 9-0 მოუგო. 1/2 ფინალში კი ფრანგი კამილ ლაროსე 8-0 გაანადგურა.

ნინო ოძელაშვილი ევროპულ თამაშებზე ვერცხლის მედალს დაეუფლა.

სამშობლოში მინდია ლილუაშვილიც ვერცხლის მედლით დამშვენებული  დაბრუნდება.  მან ერთადერთი ფინალური ბრძოლა მასპინძელ მოჭიდავე ალექსანდრ კოკშასთან წააგო.   1/4 ფინალში და 1/2 ფინალში კი რუს ნიკიტა კლევკოვს  და აზერბაიჯანელი ემილ ჰასანოვს მოუგო.

ევროპულ თამაშებზე ერთადერთი ბრძოლა წააგო მძიმეწონოსანმა ელენე ქებაძე.  მან უკრაინელ ანასტასია სასპაისთან ვერაფერი გააწყო.  ფინალამდე ქებაძე რუსი ანა ბალაშოვასა და ფრანგი ელენა ჩირაკის ძლევის შემდეგ გავიდა.

ევროპულ თამაშებზე ბრინჯაოს მედალი 82 კილოგრამში ბექა ბერულავამ მოიპოვა.

საბოლოოდ, პირველი საბრძოლო დღის შემდეგ ქართველმა სამბისტებმა 6 მედალი დაისაკუთრეს.

ხვალ, მინსკის ხალიჩაზე მედლები მოპოვებას გივი ნადარეიშვილი (-52),  გენადი ჩირგაძე (- 62 კგ),  სალომე აბაშიძე ( – 60 კგ),  ლევან ნახუცრიშვილი (-74 კგ),  პაატა ღვინიაშვილი (- 90 კგ), ირინე ლეონიძე (-80) და ბექა ბერძენიშვილი (+100 კგ) შეეცდებიან.

 

0 კომენტარი
0

მსგავსი პუბლიკაციები

დატოვეთ კომენტარი