მთავარი მთავარი ღვინიაშვილი V ჭრიკიშვილის ფინალის მოლოდინში… ბუდაპეშტში კვარცხლბეკისთვის 9 ქართველი იბრძოლებს

ღვინიაშვილი V ჭრიკიშვილის ფინალის მოლოდინში… ბუდაპეშტში კვარცხლბეკისთვის 9 ქართველი იბრძოლებს

187 ნახვა

ხვალიდან 14 რიცხვის ჩათვლით უნგრეთის დედაქალაქ ბუდაპეშტში დიდი ძიუდო იქნება. იქაური გრან-პრის ჩემპიონ-პრიზიორობისთვის ერთმანეთს 85 ქვეყნის 625 ათლეტი გაეჯიბრება.

უკვე კარსმომდგარ მსოფლიოს პირველობამდე, რომელიც 25-31 აგვისტოს გაიმართება ამომავალი მზის ქვეყანაში, ამის გარდა მხოლოდ ერთი შეჯიბრებაღაა დარჩენილი და მონაწილეთა ასეთი უხვობა ამას უნდა დავაბრალოთ – ზოგი საშეჯიბრო პრაქტიკას იმაღლებს, ზოგიც კი შიდა კონკურენციაში ცდილობს პირველობის დამტკიცებას.

ტურნირი, რა თქმა უნდა, არ ჩაივლის ქართველების გარეშე და ჩვენებურებიდან საჩემპიონო კონკურენციაში შემდეგ 9 ფალავანს ვიხილავთ:

ვაჟებიდან:

60 კგ – ჯაბა პაპინაშვილი და თემურ ნოზაძე

81 კგ – ტატო გრიგალაშვილი

90 კგ – ბექა ღვინიაშვილი და ავთანდილ ჭრიკიშვილი

100 კგ – გიორგი ბერიაშვილი

+100 კგ – გელა ზაალიშვილი და ონისე ბუღაძე

ქალებიდან:

52 კგ – ტატიანა ლევიცკა შუკვანი

 

ახლა რაც შეეხება წილისყრას, მივყვეთ დღეების მიხედვით:

12-ში მოასპარეზენი:

ფინალამდე ერთმანეთს აცდენილები არიან ახალგაზრდებში ევროპისა და მსოფლიოს მესამე პრიზიორი ჯაბა პაპინაშვილი და წლევანდელი პარიზის გრან-სლემის მესამე პრიზიორი თემურ ნოზაძე, თუმცა იქამდე ორთავეს დიდი ბრძოლები ელით.

ჯაბა თავიდან დაისვენებს და მერე საერთაშორისო ფედერაციის დროშის ქვეშ მოჭიდავე მოჰამედ ხედერ ლოფტისა და ბრაზილიელი იტალო კარვალოს წყვილში მოგებულს დაეჭიდება. აქ მოგებულს მომდევნო ეტაპზე მონღოლთა მსოფლიოს ექსჩემპიონის ბოლდბაატარ განბატის, ვისთანაც რევანში გვაქვს ასაღები თბილისში განცდილი მარცხისთვის, რუსების ქართველი ფალავნის იაგო აბულაძისა და ბულგარელი იანესლავ გერჩეის ტრიოდან უმჯობესი ელოდება.

ამავე ქვეჯგუფშია ესპანელების ევროპის ორგზის მედალოსანი ფრანცისკო გარიგოსი.

მსოფლიოს ჩემპიონთან და ოლიმპიურ ვერცხლის პრიზიორთან ყაზახეთიდან იელდოს სმეტოვთან ეკვეთება გზები მეოთხედფინალის საგზურისთვის თემურ ნოზაძეს, მაგრამ იქამდე 2 მეტოქე ჰყავს დასამარცხებელი – გონსალო მანსინო პორტუგალიიდან და კერმან ნურილაევი უზბეკეთიდან.

ქალთა ფრთაზე ჩვენი ერთადერთი წარმომადგენელი ტატიანა ლევიცკა შუკვანი რუსების ევროპის 2017 წლის ვიცეჩემპიონით ალესია კუზნეცოვათი დაიწყებს გამოსვლას.

13-ში მოასპარეზენი:

დიდი გამოცდილს ჩაბარება მოუწევს ბუდაპეშტურ ტატამზე ტატო გრიგალაშვილს, რამეთუ მის წონაში ყველაზე მეტმა, 66-მა ძიუდოისტმა მოიყარა თავი. ჩვენებური პირველი წრიდან თავისუფალია, მეორეში კი ესპანელ იგორ ჰერერო ზაპირანთან მოუწევს დაჭიდება.

ჯგუფში ყველაზე გამოსარჩევები ივაილო ივანოვი, ანრი ეგუტიძე და კრისტიან პარლატი ჰყავს.

მათგან ივანოვს ტატო მეოთხედფინალამდე არ ხვდება, აი პარლატის კი, შესაძლოა, მეორე შეხვედრაშივე გადაეყაროს, ცადია თუ ის თავის შეხვედრებს რუმინელ ვისანთან და ბერძენ ცოკოურისთან წარმატებით დაასრულებს.

მერვედფინალში გამოდის ჩვენზე პორტუგალიის სახელით მოჭიდავე ეგუტიძე.

14-ში მოასპარეზენი:

თავში მსოფლიოს ჩემპიონატი ვახსენე და 90 კილოგრამი სწორედ ის წონაა, სადაც ჯერაც უცნობია თუ ვინ დაიცავს ტოკიოში საქართველოს ღირსებას. კონკურენციში ყველაზე დაწინაურებული შემდრგი 4 ფალავანია – ბექა ღვინიაშვილი, გიორგი პაპუნაშვილი, ავთანდილ ჭრიკიშვილი და უშანგი მარგიანი.

მათგან ბუდაპეშტში ძალებს ღვინიაშვილი და ჭრიკიშვილი მოსინჯავენ და შანსია ფინალში ქართული ძიუდოს კლასიკად წოდებული ჯახიც ვიხილოთ.

რთული გამოცდის ჩაბარება მოუწევს ავთანდილ ჭრიკიშვილს. ის ასპარეზობას პოლონელი პიოტრ კუჩერასთან პაექრობით დაიწყებს და მისი ძლევის შემთხვევაში უდიდესი ალბათობით ესპანელთა ქართველი მსოფლიოს ჩემპიონთან, ნიკოლოზ შერაზადიშვილთან მოუწევს დაჭიდება.

იოლი გასეირნება არ ღვინიშვილს ელის, რომელიც ჯგუფში მსოფლიოს ვიცეჩემპიონ ივან ფელიპე სილვა მორელთან მოხვდა, ბადეში კი კრისტიან ტოტთან და სოიჩირო მუკაისთან. გორელი ათლაეტი მათამდე სვლას 81-დან ამონაცვლებული უზბეკით, იახო იმამოვით დაიწყებს.

ავსტრიელი აარონ ფარა ერგო მეტოქედ გიორგი ბერიაშვილს და თუ იყოჩაღებს ესტონელ გრიგორი მინასკირზე გავა.

გელა ზაალიშვილისა და იტალიელი ვინჩენცო დარკოს გზები წლეულს ერთხელ უკვე გადაიკვეთა თბილისურ ტურნირზე და მაშინ იოლადაც მოუგო. წესითა და რიგით არც ამჯერად უნდა გაუჭრდეს ჩვენებურს აპენინელის ძლევა და თუ ეს არ იქნება მერე რუსი ბოსტანოვისა და ტაჯიკი რახიმოვის წყვილში მოგებულთან გაარკვევს მეოთხედფინალის საგზურის მფლობელს.

ონისე ბუღაძე პირველსავე წრეში დომინიკელ ხოსე ალკანტარას ხვდება და თუ მოუგებს უზბეკ ბეხმუროდ ოლტიბოევსა და ავსტრალიელ ლიამ პარკს შორის მოგებულს გაეჯიბრება.

სამთავე დღის წინასწარი ასპარეზობები 12:30 საათიდან აიღებს სტარტს, ფინალური ბლოკი კი 19:00-დან.

 

0 კომენტარი
0

მსგავსი პუბლიკაციები

დატოვეთ კომენტარი