მთავარი ჭიდაობაძიუდო სამი ბუდაპეშტური მედლის ამბავი – გრიგალაშვილის ოქროს ღვინიაშვილმა და ზაალიშვილმა მხარი ბრინჯაოთი აუბეს

სამი ბუდაპეშტური მედლის ამბავი – გრიგალაშვილის ოქროს ღვინიაშვილმა და ზაალიშვილმა მხარი ბრინჯაოთი აუბეს

37 ნახვა

დაასრულეს ჩვენმა ძიუდოისტებმა ძიუდოს მსოფლიო ტურის მორიგ “დიდ პრიზზე” გამოსვლა, რომელსაც 12-14 რიცხვებში უნგრული ბუდაპეშტი მასპინძლობდა. ქართულ ყულაბაში თავი სამმა მედალმა მოიყარა – გუშინწინ ტატო გრიგალაშვილის მოპოვებულ ოქროს გუშინ ბრინჯაოები ბექა ღვინიაშვილმა და გელა ზაალიშვილმა დაუმატეს.

ამ სამი მედლით კი ჩვენმა ნაკრემა საკუთრივ ვაჟთა გუნდურ ჩათვალში მეოთხე საუკეთესო შედეგი აჩვენა.

გრიგალაშვილის უნგრულ ტრიუმფზე უკვე მოგახსენეთ (სრულად შეგიძლიათ იხილოთ აქ – გრიგალაშვილის უნგრული გახარება) და ახლა მხოლოდ იმასღა დავამატებ, რომ ის ლუკა მაისურაძესთან ერთად 81 კილოში ძალიან ძლიერ შიდა კონკურენციას ქმნის და გარდა ამისა უკვე ორთავე წონის ერთერთ გამორჩეულ ფალავნებათაც ჩამოყალიბდნენ.

ახლა რაც შეეხებათ ბრინჯაოსმედალოსნებს:

საკმაოდ რთული გზის გავლა მოუწია მედლამდე ბექა ღვინიაშვილს. მან პირველივე პაექრობაში საკმაოდ გამოცდილი უზბეკი იახო იმამოვი დაამარცხა შებოჭვით, შემდეგ იმავე სტილში მოუგო იტალიელთა მსოფლიოს ფინალისტს მატეო მარკონჩინის, მესამე წრეში კი უკრაინელ ვადიმ სინიავსკისთან ვაზარით გამარჯვებას დასჯერდა.  მერე კი იყო დასანანი მარცხი მეოთხედფინალში კუბელმა მსოფლიოს ვიცეჩემპიონ ივან ფელიპე სილვა მორალესთან და შეწყვეტილი სხვა ოქრომდე.

დამამშიდებელში გადართულმა ღვინიაშვილმა ჯერ ტაჯიკი უსტოპირიონის ბარიერი დაძლია იპონით, ბრინჯაოსთვის კი ყაზახ ისლამ ბოზბაევსაც აჯობა – ჯერ შესანიშნავ სტილში დააგდო ვაზარიზე, მოგვიანებით კი მესამე შიდოც აკიდა.

ტურნირზე ერთადერთი მარცხი ახალგაზრდებში ევროპისა და მსოფლიოს ჩემპიონმა ზაალიშვილმა ნახევარფინალში იწვია კოკორო კაგეურასთან, როცა გამოცდილმა და ვერაგმა იაპონელმა წამიერი უყურადღებობა არ აპატია და ეგრევე გდებაზე მოაყოლა. აი დანარჩენ ოთხ შეხვედრაში კი ჩვენმა ახალგაზრდა მძიმეწონოსანმა საკმაოდ მაღალი დონის ძიუდო აჩვენა. ბრინჯაოს ფინალში გელამ ვაზარით ჩამორჩენა იპონით აღმოფხვრა უზბეკ ბეკმუროდ ოლტიბოევთან, მანამდე კი ქვეჯგუფში იტალიელ დ არკოს, რუს ბოსტანოვსა და სლოვენიელ დრაგიჩს ზედმეტი პრობლემების გარეშე გაუსწორდა.

ამ სამეულის გარდა უნგრეთში ძალებს კიდევ 6 ქართველი ცდიდა, თუმცა ექვსივე ვადაზე ადრე გამოეთიშა ასპარეზობას.

0 კომენტარი
0

მსგავსი პუბლიკაციები

დატოვეთ კომენტარი