მთავარი მთავარი სასიამოვნო წარსულის გახსენება – 38 წლის შემდეგ თბილისის “დინამო” “ფეიენოორდს” ისევ დაუპირისპირდება

სასიამოვნო წარსულის გახსენება – 38 წლის შემდეგ თბილისის “დინამო” “ფეიენოორდს” ისევ დაუპირისპირდება

ავტორი კახა მიხანაშვილი
51 ნახვა

საქართველოს ყველაზე ტიტულოვანმა გუნდმა თბილისის “დინამომ” უეფას ევროპა ლიგის მეორე საკვალიფიკაციო ეტაპზე აზერბაიჯანული “გაბალას” წინააღმდეგობა წარმატებით დასძლია და მესამე რაუნდში ჰოლანდიის სახელოვან კლუბ როტერდამის “ფეიენოორდს” დაუპირისპირდება.

“დინამოს” “ფეიენოორდთან” სასიამოვნო მოგონებები აკავშირებს.
ქართული ფეხბურთის ზეობის დროს, 80-იან წლებში, როდესაც “დინამომ” ისტორიაში ყველაზე დიდ წარმატებას მიაღწია და თასების მფლობელთა თასი აღმართა, თბილისელებმა საჩემპიონო გზიდან სწორედ ეს ჰოლანდიური კლუბი ჩამოიცილეს.

თასების თასზე 1/4 ფინალში ლონდონის “ვესტ ჰემთან” დიდებული ასპარეზობის შემდეგ წილისყრამ “დინამოს” მეტოქედ “ფეიენოორდი” არგუნა.

პირველი მატჩი მაშინდელი საბჭოთა კავშირის რესპუბლიკის საქართველოს დედაქალაქში ჩატარდა.

დღევანდელი “დინამო არენა” მაშინ რატომღაც საბჭოთა ბელადის ვლადიმერ ილის ძე ლენინის სახელს ატარებდა.

ჯვარი აქაურობას და დიდი ლენინი როცა გარდაიცვალა, მაშინ “დინამო” ჯერ დაარსებულიც არ იყო.  ამ საპატიო მიზეზით ,,ილიჩს” ქართული ფეხბურთის ფლაგმანის გუნდის თამაში ნანახი არ ჰქონდა.

ასეა თი ისეა “ლენინის” სტადიონზე 1981 წლის 8 აპრილს 80 000 მაყურებლის თვალწინ ერთმანეთს “დინამო” და “ფეიენოორდი” შეებნენ.

იმ დროინდელ “დინამოში” სხვა ქართველ ფეხბურთელებთან ერთად ისეთი ვარკვლავები ბრწინავდნენ, როგორიც ოთარ გაბელია, საშა ჩივაძე, ვიტალი დარასელია, თენგიზ სულაქველიძე, ვოვა გუცაევი, დათო ყიფიანი და რამაზ შენგელია არიან.

ნოდარ ახალკაცის ხელმძღვანელობით თბილისში ამ ბიჭებმა არაერთი ფეხბურთის აღიარებული გრანდი წააქციეს. მათ შორის იმ დროისთვის უძლიერესი “ლივერპული”.

ჰოლანდიური კლუბის წინააღმდეგ თენგიზ სულაქველიძის ბენეფისი შედგა. “ჭომამ” მატჩში დუბლი შეასრულა.
მის გოლების შუაში კი თავი ვლადიმერ გუცაევმაც გამოიჩინა.

ნიდერლანდთა სამეფოს კლუბი “დინამომ” შინ, შერცხვენილი გაუშვა.

3-0 გამარჯვების შემდეგ როტერდამში ჩვენ ბიჭებს “ფეიენოორდის” ფეხბურთელები, ქომაგი და რაც მთავარია მსაჯი ერთობლივად დაუპირისპირდნენ. მატჩის უნამუსო არბიტრმა ქართველებს ორი ალალად, წესების დაცვით გატანილი გოლი არ ჩაუთვალა.

“დინამომ” მსაჯებსაც აჯობა ჰოლანდიურ გუნდსაც და 0-2 დამარცხების მიუხედავად დასავლეთ გერმანიის ქალაქ დიუსელდორფში გასამართი თასების მფლობელთა თასის ფინალის საგზური დაისაკუთრა.

და აი 38 წლის შემდეგ ამჯერად ევროპა ლიგაზე “დინამოსა” და “ფეიენოორდის” გზების ისევ გადაიყარა.

მართალია, ჩვენი “დინამო” ის აღარ არის რაც იყო, თუმცა არც ეს “ფეიენოორდია” ვარსკვლავების მოთამაშე.

ამ 38 წლის განმავლობაში “ფეიენოორდი” ჰოლანდიის ჩემპიონი 4-ჯერ გახდა. ჰოლანდიის თასი კი 9-ჯერ აღმართა. მათ 2000-2001 წლების სეზონში უეფას თასის ფინალშიც ითამაშეს.

საქართველო კი დიდი ბრძოლის შემდეგ საბჭოთა კავშირს გამოეყო და 1990 წლიდან მოყოლებული დამოუკიდებელი საქართველოს საფეხბურთო ჩემპიონატი იმართება. ამ ხნის განმავლობაში “დინამომ” 16-ჯერ საქართველოს  ჩემპიონის ტიტული მოიპოვა. 13-ჯერ კი საქართველოს თასს დაეუფლა.
ევროთასებზე კი საამაყო მხოლოდ ერთხელ 2003 წელს უეფას თასის ჯგუფურ ეტაპზე გასვლა გვაქვს.

თუ წელსაც გსურს ამჯერად ევროპა ლიგის ჯგუფურ ეტაპზე აღმოვჩნდეთ, მაშინ ჰოლანდიური ბარიერი უნდა გადავლახოთ.

შეხვედრის ადგილი: 8 აგვისტო როტერდამი, ხოლო 15 აგვისტო თბილისი.

წარმატებები თბილისის “დინამოს”!

ესეც იმ ისტორიული მატჩის ოქმი

1981 წლის 8 აპრილი თასების მფლობელთა თასი 1/2 ფინალის პირველი მატჩი
თბილისი, “ვლადიმერ ლენინის სახელობის სტადიონი”

დინამო” (თბილისი) 3:0 “ფეიენოორდი” (როტერდამი)
23′ თენგიზ სულაქველიძე (1-0), 30′ ვლადიმერ გუცაევი (2-0), 51′ თენგიზ სულაქველიძე (3-0)

“დინამო”: გაბელია, კოსტავა, ჩივაძე (კაპ.), ხინჩეგაშვილი, თავაძე, დარასელია, სვანაძე, სულაქველიძე, გუცაევი, ყიფიანი, შენგელია
მთავარი მწვრთნელი: ნოდარ ახალკაცი

“ფეიენოორდი”: ჰიესე, ნიელსენი, სტაფლეუ, ვიინსტრეკერსი, ტროოსტი (75′ ბრანდი), პეტურსენი (51′ დე ლეეუვი), ნოტენი, ვან დეინსენი, ვერმეულენი, ბუდინგი, ბოუვენსი

მსაჯი: ერიკ ფრედრიქსონი

0 კომენტარი
0

მსგავსი პუბლიკაციები

დატოვეთ კომენტარი