მთავარი საქართველოეროვნული ნაკრები მილტონ ჰეიგი: „მსოფლიო თასამდე გასამართი მატჩები უნდა გამოვიყენოთ იმისთვის, რომ ზუსტად გავიგოთ როგორ უნდა ვითამაშოთ იაპონიაში”

მილტონ ჰეიგი: „მსოფლიო თასამდე გასამართი მატჩები უნდა გამოვიყენოთ იმისთვის, რომ ზუსტად გავიგოთ როგორ უნდა ვითამაშოთ იაპონიაში”

ავტორი კახა მიხანაშვილი
25 ნახვა

თურქეთის საკურორტო ქალაქ ანტალიაში მზადებას 2019 წლის მსოფლიო თასის დაწყებამდე 50 დღით ადრე, ,,ბორჯღალოსნების” გაფართოებული შემადგენლობა  განაგრძობს.

საქართველოს ნაკრების მთავარი მწვრთნელი მილტონ ჰეიგი, მზადების პროცესით კმაყოფილია.   “ბორჯღალოსანთა” თავკაცი  თურქეთში არსებულ მოსამზადებელ პირობებს იდეალურს უწოდებს და ბედნიერია, რომ ეს კურორტი  საქართველოსთან ასე ახლოსაა.    ახალი ზელანდიელი სპეციალისტი  სამხრეთ აფრიკულ “საუზერნ კინგსთან” გასამართი ტესტ-მატჩის შესახებ აცხადებს,რომ  ეს გუნდი ჩვენთვის იდეალური მოწინააღმდეგეა.

მილტონ ჰეიგი:  „მზადებით და ჩვენი პროგრესით კმაყოფილი ვარ. ბიჭები უკანასკნელი 6 კვირის განმავლობაში დაუღალავად შრომობენ და კარგ ფორმაში იმყოფებიან.  დაძაბული სამუშაო პერიოდი მორაგბეებისთვის ფიზიკურად რთული იყო, თუმცა ყველას ესმის, რომ თუ გვსურს იაპონიაში განსაკუთრებული მსოფლიო თასი გვქონდეს, ეს ასეც ასე უნდა იყოს.

ბელეკში მდებარე სპორტკომპლექსი „გლორია“ მაღალ დონეზე მოსამზადებლად ერთ-ერთი საუკეთესოა. ჩვენ გაგვიმართლა, რომ ის საქართველოსთან ასე ახლოსაა. მოედნებსა თუ დარბაზებში ყველაფერია მსოფლიო დონის ვარჯიშების ჩასატარებლად და ასეთი მაღალი დონის სავარჯიშო პირობები უფრო მეტი მუშაობისკენ გვიბიძგებს. ჩვენ ამ პროცესისგან დიდ სიამოვნებას ვიღებთ.

ძალიან კარგია, რომ რუსეთის ნაცვლად კარგი სპარინგ-პარტნიორი ვიპოვეთ.  დიდი მადლობა სამხრეთ აფრიკულ ,,კინგსს”, რომელიც თბილისში სათამაშოდ ჩამოსვლას დათანხმდა. ადრე ეს გუნდი ზე-რაგბში თამაშობდა, ახლა კი პრო 14-ში რეგულარულად ხვდება ისეთ გუნდებს, როგორებიც ,,ლენსთერი” და ,,მანსთერი”  არიან. შოტლანდიელებთან შეხვედრებამდე, ის ჩვენთვის იდეალური მოწინააღმდეგე იქნება.

მსოფლიო თასამდე გასამართი მატჩები უნდა გამოვიყენოთ იმისთვის, რომ ზუსტად გავიგოთ როგორ უნდა ვითამაშოთ იაპონიაში. ჩვენ გვექნება ახალი ვარიანტები როგორც შეტევაში, ასევე დაცვაში. ამ სამი თამაშის შემდეგ, ჩვენი სისტემა, ტაქტიკა და მოთამაშეები მზად იქნებიან ტიერ1-ის ქვეყნების ნაკრებებთან სათამაშოდ“.- განაცხადა საქართველოს ნაკრების მწვრთნელმა მილტონ ჰეიგმა.

საქართველოს ნაკრები მსოფლიოს პირველობაზე პირველ მატჩს 23 სექტემბერს,  უელსთან გამართავს.  ტურნირი კი მასპინძელი იაპონიისა და რუსეთის ნაკრებების შეხვედრით  20 სექტემბერს, გაიხსნება.

წყარო: საქართველოს რაგბის კავშირი

0 კომენტარი
0

მსგავსი პუბლიკაციები

დატოვეთ კომენტარი