მთავარი მთავარი “საბურთალოს” დაკარგული ისტორიული შანსი და ქართული გუნდების ფიასკო ევროთასებზე

“საბურთალოს” დაკარგული ისტორიული შანსი და ქართული გუნდების ფიასკო ევროთასებზე

ავტორი კახა მიხანაშვილი
51 ნახვა

მოყვარეს პირში უძრახე, მტერს პირს უკანაო”.  გვარიგებდა ჩვენი დიდი წინაპარი ილია ჭავჭავაძე.  ახლა სწორედ ის დროა, როდესაც მოყვარეს პირში უნდა ვუძრახოთ და სიმართლე ვილაპარაკოთ რაც არ უნდა მწარე მოსასმენი იყოს იგი.

საქართველოს მოქმედმა ჩემპიონმა თბილისის “საბურთალომ”  ევროპა ლიგის ჯგუფურ ეტაპზე გასასვლელად ხელიდან ისტორიული შანსი გაუშვა.  ალბათ, თბილისელებს თავად, რომ აერჩიათ ევროპა ლიგის სავარაუდო მეტოქეები, ასეთ კარგ და ვიტყოდი სუსტ მოწინააღმდეგეებს ევროთასების ამ ეტაპზე ვერ აირჩევდნენ.

“საბურთალოს” ჯერ “არარატ არმინია” უნდა გამოეთიშა ევროთასებიდან და შემდეგ ლუქსემბურგის “დუდელანჟისა” და ესტონურ “კალიუს” შორის ორრაუნდიან ორთაბრძოლაში გამარჯვებული.

ასე არცერთ წელს, არცერთ ქართულ გუნდს კენჭისყრაში არ გამართლებია.  მაგრამ რათ გინდა. ერევანში 2-0 გამარჯვებიდან 1 კვირის თავზე “საბურთალომ” შინ, “მიხეილ მესხის” სტადიონზე 0-2 წააგო და ევროთასებს უსახელოდ დაემშვიდობა.  როდესაც გუნდს ასეთი დიდი შანსი აქვს, ეს შანსი აუცილებლად უნდა გამოიყენოს და ევროპული მაშტაბით ძალიან სუსტ გუნდთან ასე უიმედოდ არ უნდა წააგოს.

“საბურთალომ” გუშინდელ შეხვედრაშიც, ზუსტად იგივე შეცდომები დაუშვა, რაც ჩემპიონთა ლიგის საკვალიფიკაციო ეტაპის პირველი ტურის მატჩში, როდესაც ტირასპოლში “შერიფთან” მოგებული 3-1 შემდეგ თბილისში გამართულ მატჩში უპირატესობა პირველ 10 წუთში გაანიავა.  მაშინ “ბეწვის ხიდზე” გავლის მიუხედავად “საბურთალოს” გაუმართლა და მოლდოვური ბარიერი გადალახა.  ჩემპიონთა ლიგის მეორე საკვალიფიკაციო ეტაპზე კი ზაგრების “დინამომ” ჩვენი ჩემპიონი სარკეში ჩაახედა და ორი მატჩის ჯამში 5-0 დაამარცხა.

ახლა დაიწყება თავის მართლების ნაცადი ხერხი და ფრაზები.   ქართულ საფეხბურთო გუნდებს ფული არ აქვს, გაცილებით დიდი ფინანსური რესურსი აქვს სომხურ გუნდებსო, პირველ 10 წუთში გოლი, რომ არ გაგვეშვა სულ სხვა თამაში იქნებოდაო,   გოლი არ ჩაგვითვალესო, კარგი ამინდი იყო, თორემ წვიმაში და ქარბუქში დავაგრევდით სომხებსო, “საბურთალო” ევროთასებზე პირველად გამოდიოდაო,  სხვა ქვეყნებივით აწყობილი ქვეყანა, რომ იყოს საქართველო უკეთესი შედეგს დავდებდითო და ა.შ.  ეს ყველაფერი ფუჭი თავის მართლება და თვალში ნაცარის შეყრა იქნება. ქართველი ქომაგი ფეხბურთში მეტ-ნაკლებად კარგად ერკვევა და მათი მოტყუება ძნელია.  თან ჩვენს შედარებით ხანშიშესულ გულშემატკივრებს ბევრი დიდი მატჩი საკუთარი თვალით უნახავთ და თბილისიდან განადგურებული “ლივერპული”, “ფეიენოორდი”  და სხვა გრანდი გაუცილებიათ.

ასეა თუ ისე წლევანდელ ევროთასებზე გამოსვლა შარშანდელზე უარესი გამოვიდა.  გასულ სეზონში ქუთაისის “ტორპედომ” ევროპა ლიგის ფლეი-ოფში შეძლო გასვლა.  წელს კი ამ ეტაპს ვერცერთმა ქართულმა გუნდმა ვერ უწია.  მართალია, ოფიციალურად თბილისის “დინამო” ევროპა ლიგიდან ჯერ არ გავარდნილა, თუმცა როტერდამში “ფეიენოორდთან” 0-4 წაგების შემდეგ დღეს, თბილისის “დინამო არენაზე” ცარიელი ტრიბუნების ფონზე შემდეგ ეტაპზე გასვლა იმდენად უტოპიურად ჟღერს, როგორც მაგალითად “საბურთალოს” მძლეველმა “არარატ არმენიამ” ევროპა ლიგის თასი, რომ აღმართოს.

რეალობა კი ასეთია ფინანსურ კრიზისში მყოფი ქუთაისის “ტორპედო” ევროთასებს პირველივე წრეში გამოეთიშა,  საჩხერის “ჩიხურა” საშუალოზე დაბალ ევროპულ გუნდ “აბერდინთან” განადგურდა,  “საბურთალომ” “არარატ არმენიას” ბარიერი ვერ გადალახა.  წლევანდელი ევროთასების შემდეგ ერთადერთი გასასამართლებელი საბუთი თბილისის “დინამოს” ექნება, რადგან საქართველოს ყველაზე ტიტულოვანი გუნდი ყველაზე ძლიერ როტერდამის “ფეიენოორდთან” გავარდება.

ამ ყველაფრის ფონზე კიდევ ერთხელ დაისმევა კითხვები:  რამდენად სწორად იხარჯება სახელმწიფოს მიერ  ქართულ ფეხბურთისთვის გამოყოფილი თანხები?,  არის თუ არა ეს ფული წყალში გადაყრილი? და ა.შ.  ფაქტია, რომ ეროვნულ ჩემპიონატში ზოგიერთ გუნდ ფინანსური კრიზისი ისევ აქვთ.

მოკლედ, ისევ ევროპა ლიგის ჯგუფური ეტაპის გარეშე დავრჩით, ქართველმა ქომაგებმა ისევ იმედგაცრუება მივიღეთ, ისევ მომავლის იმედზე ვართ, რომ იქნებ ჩვენს ფეხბურთშიც მოვიდეს გაზაფხული.  ჩვენი გუნდების უნიათობის ფონზე ევროპალიგის ჯგუფურ ეტაპზე რეგულარულად გადიან აზერბაიჯანული და ყაზახური გუნდები.  გასულ სეზონში იქ გასვლა ლუქსემბურგის “დუდელანჟმაც”  მოახერხა.  ჩვენ კი ისევ რაღაცეებს ვიმიზეზებთ, რომ დაბალი დონის გუნდებთან წაგებები გავამართლოთ.

არ ვიცი კიდევ რამდენი წელი მოგვიწევს ლოდინი ევროპა ლიგის ჯგუფურ ეტაპზე ქართული გუნდის გასვლის სანახავად, მაგრამ ფაქტია, რომ ჩვენმა კლუბებმა  ამ წაგებების ფონზე  ბევრი რამე უნდა ისწავლონ, შეცდომები უნდა გაანალიზონ და  გუნდებში მეტი პროფესიონალი უნდა დაასაქმონ.

 

 

 

 

0 კომენტარი
0

მსგავსი პუბლიკაციები

დატოვეთ კომენტარი