მთავარი მთავარი შავდათუაშვილი V ონო, ღვინიაშვილი V მუკაი… ტოკიოში წილი იყარა

შავდათუაშვილი V ონო, ღვინიაშვილი V მუკაი… ტოკიოში წილი იყარა

271 ნახვა

მეორე, მესამე და მეათეხარისხოვანი გახდა ყველანაირი პროგნოზები თუ მიმოხილვები. ძიუდოს სამშობლოში, ძიუდოისტთა მსოფლიოს ჩემპიონატზე, წილისყრა გაიმართა და იქ ჩასულმა 841 ფალავანმა 147 ქვეყნიდან უკვე იცის სამედლო გზაზე თუ ვისთან მოუწევს დაჭიდება.  და ახლა უკვე ყველაფერი მათზე და მათ ყოჩაღობაზეა დამოკიდებული.

ასეა ქართული ათეულის შემთხვევაშიც და წილისყრამ რთულზე რთული ამოცანები დაგვისახა.

-60

ლუხუმ ჩხვიმიანი უკვე მეორე წრეში მისთვის კარგადნაცნობ მეტოქესთან ფრანცისკო გარიგოსთან მოხდა, ოღონდ იქამდე ჰონ კონგელი ლონგ ლაი ჰყავს დასამარცხებელი. ასევე ამავე ბადეში რუსების ქართველი მსოფლიოს შარშანდელი ვიცეჩემპიონი რობერტ მშვიდობაძე, რომელთანაც ჩვენს ფალავანს გზები მეოთხედფინალში ეკვეთება.

ურიგო ბადე არ შეხვედრია ამირან პაპინაშვილს და წესით ნახევარფინალამდე მისვლა არ უნდა გაუჭირდეს. პირველ შეხვედრას ის ევადორელ ლენინ პრეციადუსთან გამართავს და მერე ბელგიელი ვერსტრაეტენსა და მავრიტანელი კუფირის წყვილში მოგებულს დაელოდება.

ამ ქვეჯგუფში ყველაზე გამოსარჩევი მონღოლი დაშდავაა, თუმცა მას ჩვენებური მეოთხედფინალამდე არ ხვდება.

-66

ამირანის არ იყოს, არც ვაჟა მარგველაშვილის ბადეს დაეწუნება რაიმე. ჩვენი ევროპის ჩემპიონი და მსოფლიოს ბრინჯაოს მედალოსანი პირველ წრეში თავისუფალია, მეორეში კი ეგვიპტელი აბელრამანის და არგენტინელი ამოგოს შორის უჯობეს დაეჭიდება. მესამე წრეში ვაჟა გერმანელი სეიდლის, კორეელი კიმის და თურქმენი კოსეკობის სამეულიდან უძლიერესზე გადის და ეს ალბათ დიდი ალბათობით გერმანელი ფალავანი იქნება. მართალია ბოლო ქართულ-გერმანული პაექრობა ვაჟას გამარჯვებით დასრულდა, თუმცა შარშანდელ მსოფლიოზე სწორედ სეიდლმა გადაგვიღობა მედლისაკენ მიმავალი გზა. ასე რომ რევანში გვაქვს ასაღები.

ბადის მა ხარეს განთესილი ძიუდოისტებიდან ბრაზილიელი დანიელ კარგნინი მოხდა, თუმცა მას ჩვენებური პირად დაპირისპირებებში 3:0-ს უგებს.

ამის საპირწონედე ურთულესი გამოცდის ჩაბარება მოუწევს ბაგრატ ნინიაშვილს. ტალ ფლიკერი, გიორგი ზანთარაია, ბაულ ანი, ჰიფუმი აბე… ყველა მის მხარეს განმწესდა და მათგან მხოლოდ აბესა რ ხვდება მეოთხედფინალამდე. ოლიმპიური ვიცეჩემპიონისა და მსოფლიოს ჩემპიონის ანისა და ბაგრატის გზები უკვე მესამე წრეში იკვეთება, ხოლო ზანთარაია-ფლოკერი წყვილში მოგებულზე მერვედფინალში გადის.

-73

თუ ვინმეს არ გაუმართლა წილისყრაში ყველაზე მეტად ეს ალბათ ლაშა შავდათუაშვილია. რეიტინგიდან გამომდინარე წინასწარვე იყო ცნობილი, რომ ტურნირს განუთესავი ხვდებოდა ოლიმპიური და ორგზის მსოფლიოს ჩემპიონი შოჰეი ონო და ისე მოხდა, რომ სწორედ ჩვენს ბადეში განწესდა და თანაც მერვედფინალურ ეტაპზე. ანუ აქ წაგებულს დამამშვიდებელში გადართვის შანსიც აღარ მიეცემა.

შავდათუაშვილი ასპარეზობას სენეგალელი დიოპისა და ავსტრალიელი კნოსტერის წყვილში მოგებულით გახსნის და ემირატებში გადაბარგებული მოლდოველი სვორტოვისა და ამერიკელი დელპოპოლს, ასევე წყვილში მოგებულით, გააგრძელებს.

-81

ევროპული თამაშების მესამე პრიზიორი ლუკა მაისურაძესთვის ეს მსოფლიო სადებიუტია. 21 წლის ხაშურელმა ფალავანმა დიდების სარბიელზე მხოლოდ წლეულს შემოაბიჯა თუმცა წონის არაერთ წონიან ფალავანს უკვე გამოუყვანა წირვა. ახლა კი ეცდება მსოფლიოს კვარცხლბეკსაც გაუსინჯოს გემო.

მართალია ლუკა აცდა მისთვის უხერხულ მეტოქეს მატიას კასეს, ასევე საგი მუკისა და სოტარო ფუჯივარას, მაგრამ მალევე ხვდება მსოფლიოს შარშანდელ ბრინჯაოს მომგებ ვედათ ალბაიქარს, იგივე ვანო რევაზიშვილს. ეს მალევე კი მეორე წრეა. იქამდე კი ლუკას სამოელ პენიამინა პერსივალთან გაივარჯიშებს.

თუმცა ბადის ეს მხარის სიძლიერე მხოლოდ ალბაირაქით შემოიფარგლება.

აქვე არიან ანგარიშგასაწევი მონღოლი უუგანბაატარ ოდგონბაატარი, ბელგიელების ევროპის ვიცეჩემპიონი სამი ჩოუჩი და იტალიელთა მსოფლიოს მოქმედი ჩემპიონი ახალგაზრდებშიკსრისტიან პარლატი. ასევე ჰოლანდიელი ფრანკ დე ვიტი და პორტუგალიის სახელით მოჭიდავე ანრი ეგუტიძე.

-90

ტუნირზე იაპონელები მხოლოდ ორი განუთესავი ფალავნით იყვნენ წარმოდგენილები და ოთავე ჩვენ გვერგო. ბექა ღვინიაშვილისა და სოიჩირო მუკაის გზები მერვედფინალში იკვეთება. მართალია ჩვენებური პირად დაპირისპირებებში კი ამარცხებს ადგილობრივს 2:1-ს, თუმცა ბოლო შეხვედრაში მუკაიმ იმარჯვა.

შეჯიბრებაში ბექა მეორე წრიდან ჩაებმება და ინდოელ აიაი დევილალ მისტრისთან მოსინჯავს ძალებს. აქ მოგებულს კი მომდევნო ეტაპზე ჰოლანდიელ ჯასპერ სმინკსა და უკრაინელ ქუედაი ნჰაბალის წყვილში მოგებული ელოდება. და თუ მუკასი დამარცხებას შეძლებს და მეოთხედფინალში გააღწევს იქ ჩვენებურს ივან ფელიპე სილვა მორალესზე გავა, რომელიც მსოფლიოს შარშანდელი ვიცეჩემპიონია და რომელთანაც ღვინიაშვილის რევანში აქვს ასაღები წლეულს ბუდაპეშტში განცდილი მარცხისთვის.

ბადის ამავე მხარეს არიან ასევე სერბი ალექსანდარ კუკოლი და უნგრელი კრისტიან ტოტი, თუმცა ვფიქრობთ რომ მთავარი ბრძოლა მაინც კუბელთან ელოდება ჩვენებურს.

-100

შარშანდელი მსოფლიოსი არ იყოს ამჯერადაც ჯერ კიდევ 90 კილოდან მოყოლებული კარგადნაცნობი ფრანგი ალექსანდ იდირი ჩაუჯდა ბადეში ევროპის სამგზის ჩემპიონს და მსოფლიოსა და ოლიმპიურ ვიცეჩემპიონ ვარლამ ლიპარტელიანს.  მათი გზები მეოთხედფინალში გამსვლელ შეხვედრაში იკვეთება. მის მხარეს ასევე მოიყარეს თავი პორტუგალიელმა ჟოჟ ფონსეკამ – მეოთხედფინალის სავარაუდო მეტოქეა და ჰოლანდიელმა მაიკლ კორელმა და მონღოლმა ოტგონბაატარ ლხაგვასურენმა – ესენი ნახევარფინალის სავარაუდო მეტოქეები არიან.

ისე კი ასპარეზობას “ლიპო” ან ჩინელი ჰემიბატუერით და ან ესტონელი გრიგორი მინასკირით გახსნის.

+100

გურამ თუშიშვილმა შარშან, 4 წლიანი პაუზის შემდეგ, ისევ ააჟღერა ქართული ჰიმნი პლანეტის პირველოვაზე და ახლა ტიტული აქვს დასაცავი. თან საქმე მარტო ტიტულის დაცვაში არაა… შანსი აქვს ისტორიაში შევიდეს და თუკი ტოკიოშიც იპირველებს ისტორიაში პირველი ქართველი ძიუდოისტი გახდება ვისაც მსოფლიო ჩემპიონატი მიჯრით ორჯერ ექნება მოგებული. თანაც ლეგენდარულმა ფრანგმა ტედი რინერმა უარი განაცხადა ტოკიოში ასპარეზობაზე და ეს ჩვენებურის წარმატების შანს ერთი ორად ზრდის.

თუშიშვილი თავიდან თავისუფალია, მერე კი ინდოელ ინდოელ შუბამ კუმარს გაეჯიბრება.

ბადის ამ ხარეს გამოსარჩევები ჰოლანდიელი ჰენკ გროლი და კორეელი სუნგმინ კიმი არიან, რომლებიც მეოთხედფინალის სავარაუდო მეტოქეები იქნებიან ჩვენებურისთვის, ოღონდ ამათგან ერთ-ერთი, რადგან კორეულ-ჰოლანდიური შეხვედრა მეოთხედფინალამდე უწევს.

-52

ქალთა ფლანგზე ჩვენი ერთადერთი წარმომადგენელი ტატიანა ლევიცკა-შუკვანი ფრანგების წონის ლიდერთან ამანდინ ბუშართან გამწესდა, ვინც ბოლო ორი მსოფლიო პირველობის მედალოსანია, თუმცა მანამდე ჯერ პოლონელი  ალექსანდრა კალეტას ბარიერის დასაძლევი, მერე კი ვიეტნამელი ტჰიუ ნგუენისა და ყაზახი ანა კაზულინას წყვილში მოგებულის.

ტოკიოში ინდივიადუალური ასპარეზობები 7 დღეს გასტანს

ხვალ და 28-ში წინასწარი შეხვედრები დილის 6 საათზე დაიწყება, 26-ში და 27-ში ხუთზე, 28-ში და 29-ში შვიდზე, ხოლო 31-ში დილის რვაზე.

0 კომენტარი
0

მსგავსი პუბლიკაციები

დატოვეთ კომენტარი