მთავარი საქართველოეროვნული ნაკრები “ბორჯღალოსნების” შოტლანდიის წინააღმდეგ დაირაზმნენ

“ბორჯღალოსნების” შოტლანდიის წინააღმდეგ დაირაზმნენ

ავტორი კახა მიხანაშვილი
51 ნახვა

საქართველოს რაგბის ეროვნული ნაკრები შოტლანდიასთან მეორე ტესტ-მატჩისთვის ემზადება.

“ბორჯღალოსანთა”  ახალ ზელანდიელმა თავკაცმა მილტონ ჰეიგმა ბრიტანელთა წინააღმდეგ რაზმი დაასახელა.

წინა მატჩისგან განსხვავებით გუნდში 3 ცვლილება განხორციელდა.

ცენტრში დავით კაჭარავას ამჯერად ლაშა მალაღურაძე შეუწყვილდება. ფრთაზე  ზურაბ ძნელაძემ გადაინაცვლა,  რომელიც სანდრო თოდუას შეცვლის.    მეორე ფრთა კი კვლავ მირიან მოდებაძე ითამაშებს.

უცვლელი დარჩა შერკინების პირველი ხაზი და თამაშს გუნდის კაპიტანი მიხეილ ნარიაშვილი, შალვა მამუკაშვილი და ბექა გიგაშვილი იწყებენ. მეორე ხაზში კოტე მიქაუტაძეს ამჯერად გიორგი ნემსაძე შეუწყვილდება. მესამე ხაზში გადაინაცვლა შალვა სუთიაშვილმა, რომელიც ოთარ გიორგაძის ადგილს დაიკავებს, ხოლო მეორე ფლანკერად ბექა საღინაძეს გიორგი თხილაიშვილი შეცვლის.  შერკინების შემკვრელი კვლავ ბექა გორგაძე იქნება.

ცვლილებებია მარქაფაშიც და კვაჭად თამაშში 19 წლის ვანო კარკაძე ჩაერთვება, ბურჯებად კი გურამ გოგიჩაშვილი და გიორგი მელიქიძე შევლენ.

მეორე ხაზში შეცვლაზე ლაშა ლომიძე, ხოლო მესამეში საღინაძე შევა. 9 ნომრის მარქაფა კვლავ გელა აფრასიძეა, ასევე ცვლილებაზე რჩება თამაზ მჭედლიძე, ხოლო ხაზის კიდევ ერთი შემცვლელი გიორგი კვესელაძეა, რომელმაც ხელის ტრავმის შემდეგ რეაბილიტაცია დაასრულა და მოსამზადებელ მატჩებში პირველად ითამაშებს.

საქართველოს ნაკრების ცენტურიონი დავით კაჭარავა ეროვნული გუნდის კვართით 116-ე კეპს მოიხვეჭს და იგი ამ მაჩვენებლით მერაბ კვირიკაშვილს გადაუსწრებს.  კაჭარავს “ბორჯღალოსანთა” რიგებში ყველაზე მეტი შეხვედრა ექნება ჩატარებული.

ეროვნულ ნაკრებში ერთგვარი საიუბლიე მატჩი მირიან მოდებაძესაც ექნება.  22 მორაგბისთვის შოტლანდოასთან შეხვედრა რიგით  მე-10 იქნება.

მილტონ ჰეიგის რჩეული გუნდი შოტლანდიის წინააღდეგ ასეთია:

15. სოსო მათიაშვილი, 14. ზურაბ ძნელაძე, 13. დავით კაჭარავა, 12.  ლაშა მალაღურაძე, 11. მირიან მოდებაძე, 10. თედო აბჟანდაძე, 9.ვასილ ლობჟანიძე;

  1. მიხეილ ნარიაშვილი, 2.  შალვა მამუკაშვილი, 3. ბექა გიგაშვილი, 4. კოტე მიქაუტაძე, 5. გიორგი ნემსაძე, 6. შალვა სუთიაშვილი, 7. გიორგი თხილაიშვილი, 8. ბექა გორგაძე

მარქაფა
23. გიორგი კვესელაძე, 22. თამაზ მჭედლიძე, 21. გელა აფრასიძე;
16. ვანო კარკაძე, 17.  გურამ გოგიჩაშვილი, 18. გიორგი მელიქიძე, 19. ლაშა ლომიძე, 20. ბექა საღინაძე

შოტლანდიისა და საქართველოს მატჩი ედიმბურგში „მერიფილდის” სტადიონზე 6 სექტემბერს, შედგება.  შეხვედრა სტარტს თბილისის დროით 22:30 საათზე აიღებს.

მატჩის პირდაპირ რეპორტაჟს საზოგადოებრივი მაუწყებლის “პირველი არხი” შემოგვთავაზებს.

წყარო: rugby.ge

0 კომენტარი
0

მსგავსი პუბლიკაციები

დატოვეთ კომენტარი