მთავარი მთავარი 1 ოქრო, 4 ვერცხლი, 1 ბრინჯაო – ქართველების არგენტინული მონაგარი 

1 ოქრო, 4 ვერცხლი, 1 ბრინჯაო – ქართველების არგენტინული მონაგარი 

208 ნახვა

საქართველოს სპორტსმენებმა ბუენოს–აირესში მიმდინარე მესამე ახალგაზრდულ ოლიმპიურ თამაშებზე გამოსვლა 1 ოქროს, 4 ვერცხლისა და 1 ბრინჯაოს მედლით დაასრულეს.

16 ოქტომბერს, ოლიმპიადის ბოლოსწინა საშეჯიბრო დღეს 3X3 კალათბურთში საქართველოს ნაკრები მეოთხედფინალში მასპინძელ არგენტინას დაუპირისპირდა, 12:21 დამარცხდა და ტურნირს ამ ეტაპზე გამოეთიშა.

მრავალრიცხოვან გულშემატკივართა აქტიური მხარდაჭერით გამხნევებული მასპინძლები მთელი მატჩის განმავლობაში ფლობდნენ უპირატესობას. განსაკუთრებით გამოირჩეოდა ხუან ესტებან ფუენტე, რომელმაც 14 ქულა აიღო და დიდწილად სწორედ მისმა ოსტატობამ განსაზღვრა შეხვედრის საბოლოო შედეგი. ქართველთაგან ყველაზე მეტი – 4 ქულა მოაგროვა ოთარ პერტაიამ, 3-3 ქულა – ლუკა მაზიაშვილმა და ზურაბ ჟღენტმა, 2 ქულა – ლაშა მიქელაძემ.

ეს იყო პირველი შემთხვევა, როცა საქართველომ სათამაშო სახეობაში ლიცენზია მოიპოვა და ოლიმპიური თამაშების ფინალურ ეტაპზე გავიდა. შეიძლება ითქვას, რომ დებუტი წარმატებული გამოდგა. მიუხედავად საკალათბურთო ტურნირის სტარტზე მომხდარი დასანანი ინციდენტისა (ჩვენმა გუნდმა 9 ოქტომბერს სლოვენიასთან პირველ მატჩზე რამდენიმე წუთით დააგვიანა და ტექნიკური წაგება ჩაეთვალა), ქართველებმა  ზედიზედ სამი მატჩი მოიგეს და ჯგუფური ბარიერი წარმატებით დაძლიეს, საბოლოოდ კი 20 გუნდს შორის მე-8 ადგილი დაიკავეს.

თანამედროვე ხუთჭიდელთა ინდივიდუალური პირველობის შემდეგ, სააერთაშორისო შერეული გუნდის შემადგენლობაში გამოვიდა გაგა ხიჯაკაძე. მან უნგრელ მიშელე ჯულიასთან ერთად მე-12 ადგილი დაიკავა.

0 კომენტარი
0

მსგავსი პუბლიკაციები

დატოვეთ კომენტარი