მთავარი მთავარი ქართულ ფინალში გრიგალაშვილმა იმარჯვა, ჭანტურია მიჯრით მეორედ ავიდა ევროპულ კვარცხლბეკზე

ქართულ ფინალში გრიგალაშვილმა იმარჯვა, ჭანტურია მიჯრით მეორედ ავიდა ევროპულ კვარცხლბეკზე

81 ნახვა

ქართული ძიუდოსთვის ქართული ფინალი აღარაა უცხო ხილი, თუმცა მსგავსი პრეცედენტი, მით უფრო ისეთი დონის შეჯიბრებაზე როგორიც კონტინენტის პირველობაა, ძალიან სასიამოვნოა და გასახარი. და დღეს სწორედ ასეთ შემთხვევასთან გქვონდა საქმე ფინურ ვანტააში მიმდინარე ძიუდოისტთა ევროპის ახალგაზრდულ ჩემპიონატზე.

81 კილოს საჩემპიონო პაექრობაში ერთმანეთის პირისპირ ახალი თაობის გამორჩეული ტალანტი ტატო გრიგალაშვილი და ვლადიმერ ახალკაცი წარსდგა.

გზად ფინალამდე გრიგალაშვილმა ერთი ამოსუნთქვით, ულამაზესი გდებებით გადაურბინა უკრაინელ პილიპენკოს, ბოსნიელ ელეზის, ბრიტანელ მურჰედს და ლატვიელ ზარუდნებს. ამის პარალელურად  ბადის მეორე მხარეს არც ახალკაცი ინდობდა მეტოქეებს და შვეიცარიელმა გაუჩი, თურქი მუჰამედი, რუსი ნოვრუზოვი და სლოვაკი ბარტო სულ აქეთ-იქით მიყარ-მოყარა.

ქართულ ფინალში გამარჯვება გრიგალაშვილს დარჩა ოქროს დროში შესრულებული კაურით.

გოგონათა ფლანგზე მარიამ ჭანტურიამ გავახარა ბრინჯაოთი 70 კილოში. ის ტურნირის შარშანდელი მესამე ადგილოსანი გახლდათ და ამჯერადაც იგივე შედეგს უწია.

ტურნირზე ერთადერთი მარცხი მარიამმა ნახევარფინალში განიცადა – მომავალ ჩემპიონთან დიდი ბრიტანეთიდან კელი პეტერსობთან ტოლსწორ ბრძოლაში ოქროს დროში დამარცხდა, სამში კი იმარჯვა. ქვეჯგუფში ავსტრიელი ანა-ლენა შუხტერი და იტალიელი მარტინა ესპოზიტო დაამარცხა, ბრინჯაოსთვის კი გაფრთხილებებით მოახსნევინა ჰოლანდიელი სუია კოკი.

ორი საჭიდაო დღის შემდეგ ჩვენი ფალავნების მონაგარი 5 მედალია – 3 ოქრო და 1-1 ვერცხლ-ბრინჯაო.

0 კომენტარი
0

მსგავსი პუბლიკაციები

დატოვეთ კომენტარი