მთავარი მთავარი ვანტააში მხოლოდ ქართული ჰიმნი ჟღერს

ვანტააში მხოლოდ ქართული ჰიმნი ჟღერს

5600 ნახვა

ძიუდოს სამყარო ქართველი ვაჟების სრული ტრიუმფის მოწმე ევროპის ახალგაზრდულ პირველობაზე. ფინურ ვანტააში მდებარე ენერგი არენაზე, რომელიც აგერ უკვე სამი დღეა რაც ამ ტურნირს მასპინძლობს, საქართველოს ჰიმნის დღეს სამჯერ აჟღერდა, კვარცხლბეკზე კი ოთხი ქართველი ავიდა.

კონტინენტის უძლიერესები ლაშა ბექაური (-90), ილია სულამანიძე (-100) და  გელა ზაალიშვილი (+100) გახდნენ, ბრინჯაო კი მიხეილ ბექაურს (-90) ერგო.

ნამდვილი ომის გადატანა მოუწია ლაშა ბექაურს ნახევარფინალში რუს მანსურ ლორსანოვთან, რომლის ჯავრიც ჯერკიდევ შარშანდელიდან მოყვებოდა. გასული წლის ევროპირველოვაზე სწორედ ლორსანოვმა გამოთიშა ასპარეზობას ჩვენებური და ახლა რევანში იყო ასაღები. და რევანში შედგა! ლამის 9 წუთიანი რუს-ქართული ომი ბექაურის მოგვერდით და ბეჭებზე გაკრული ლორსანოვით დასრულდა.

იოლი არც ფინალი გამოდგა. უნგრელ როლანდ გოზთან შეხვედრაში ლაშა ვაზარით ჩამორჩა, თუმცა შეხვედრის დასრულებამდე 22 წამით მეტოქეს წელში შეუვარდა, ჰაერში აიტაცა და ულამაზესი ბრუნით პირდაპირ იპონზე დასცა.

კვარცხლბეკზე ლაშას გვერდი მიხეილ ბექაურმა დაუმშვენა, ვინც ბრინჯაოს ფინალში ასევე მანსურ ლორსანოვს სძლია. შეხვედრის სტარტზე მან რუსი საფირმო გდებით, მაჯებიდან წამოიკიდებით, ვაზარიზე დააგდო და მერე, გდებით დაწინაურებულმა, ტატქიკურად ისე სწორად წარმართა შეხვედრა მეტოქისთვის იოტისოდენა შანსიც კი არ მოუცია.

ილია სულამანიძე 18 წლის ტყიბულელი ფალავანია. ჭაბუკებიდან ახალგაზრდებში წლეულს გადმოვიდა და სადებიუტო წელსვე შეძლო ევროპაში წონის პირველი კაცი გამხდარიყო. თანაც გაიარა ურთულესი ბადე და ამას ისიც მოწმომს ამ წონის კვარცხლბეკზე მდგარი სამივე ძიუდოისტი მის მიერ დამარცხებული რომ იყო.

გელა ზაალიშვილი ტურნირზე უმთავრესი ფავორიტის რანგში წარსდგა. იაპონელი ჰისაიოში ჰარასავას, ებრაელი ორ სასონის, ჰოლანდიელი როი მეირის მომგებისთვის ძნელი წარმოსადგენი იყო ვინმე ტოლსწორი მეტოქეობა გაეწია და ასეც მოხდა. გზად ფინალამდე ბოსნიელ ვრაჩარს, უკრაინელ ბალიევსკის, და უნგრელ შიპოცს იოლად გაუსწორდა, იქ კი გერმანელ ერიკ აბრამოვს შარშანდელი გაუმეორა, ოღონდ ახლა ეს უფრო ლამაზად გააკეთა – მეტოქე ჯერ ულამაზესი ხაბარელით დააგდო ვაზარიზე, შემდეგ ჩახტომილი კისრულიც მოაყოლა და მიჯრით მეორედ მოიგო ევროპული ოქრო.

ვანტააში ინდივიდუალური ასპარეზობები დასრულდა და ხვალ ძიუდოისტები ერთმანეთს გუნდურად გაეჯიბრებიან.

0 კომენტარი
0

მსგავსი პუბლიკაციები

დატოვეთ კომენტარი