მთავარი მთავარი მსოფლიოს მოქმედმა ჩემპიონმა “ოლ ბლექსმა” სამხრეთ აფრიკას მოუგო

მსოფლიოს მოქმედმა ჩემპიონმა “ოლ ბლექსმა” სამხრეთ აფრიკას მოუგო

ავტორი კახა მიხანაშვილი
46 ნახვა

იაპონიაში მიმდინარე რაგბის მსოფლიოს თასის გათამაშებაში მთავარი ფავორიტი ახალი ზელანდიის ნაკრები ჩაერთო.

მოქმედმა ჩემპიონმა “ოლ ბლექსმა” B ჯგუფის ცენტრალურ შეხვედრაში სამხრეთ აფრიკის გუნდთან 10-ქულიანი სხვაობით 23:13 გაიმარჯვა.

მატჩში თავდაპირველად ,,სპრინბოკის” მორაგბეები დაწინაურდნენ.   პირველივე წუთზე ჯარიმიდან ზუსტი დარტყმა აფრიკელთა მგეზავმა ანდრე პოლანდმა შეასრულა 0-3.

ახალი ზელანდიის ნაკრებს ანგარიშის გასათანაბრებლად 21 წუთი დასჭირდა.   რიჩი მო’უნგამ წონასწორობა ჯარიმიდან 22-ე წუთზე აღადგინა.

23-ე წუთზე “ოლ ბლექსმა” პირველი ლელო გაიტანა.   თავი ზელანდიელთა გარემარბმა ჯორჯ ბრიჯიმ გამოიჩინა. რიჩი მო’უნგამ  პირველ ჯერზე გარდასახვა გამოიყენა 10-3.

ახალ ზელანდიელთა მძლავრმა შეტევებმა შედეგი მალევე გამოიღო.  26-ე წუთზე ლელო სკოტ ბარეტმა დადო. ლელო ბოდენ ბარეტის შესანიშნავ სოლო რეიდს მოჰყვა.  “შავების” ფულბეკის პოზიციაზე მოთამაშე მორაგბემ მეტოქის ხაზი კარგად გაჭრა და სალოლოვე პასამდე გზად რამდენიმე მოწინაარმდეგე ჩამოიტოვა.  გარდასახვისას  რიჩი მო’უნგამ მიზანს ამჯერადაც უწია 17:3.

მეორე ტაიმის სტარტზე  ქალაქ იოკოჰამას სტადიონზე შეკრებილმა გულშემატკივარმა კარგი თვალსასეირო ბრძოლა იხილა.  სამხრეთ აფრიკელებს გასახდელი მთავარმა მწვრთნელმა რასი ერასმუსმა ალბათ მკაცრად ელაპარაკა და საბრძოლველად წააქეზა.

ფაქტია, რომ აფრიკელებმა მეორე ტაიმი უკეთ ჩაატარეს და მრისხანე მეტოქეს ანგარიშიც ერთი გარდასახული ლელოს უპირატესობამდე შეუმცირეს.

ჯერ იყო და 48-ე წუთზე ლელო “ბოკეს” მეორეხაზელმა პიტერ სტეპ დუ ტოიტმა დადო, რომელსაც ანდრე პოლარდის ზუსტად დარტყმული გარდასახვა მოჰყვა, შემდეგ კი აფრიკული ნაკრების მგეზავმა პოლარდმა არეკნიც იდეალურად შეასრულა.

შედეგად ანგარიში გვარიანად შემცირდა და ზელანდიელთა სასარგებლოდ მხოლოდ 17:13 გახდა.

იგრძნო რა “ოლ ბლექსმა” მეტოქის მოახლოვება, შეტევაში თამაში კიდევ უფრო გააძლიერა.

66-ე წუთზე მოქმედი ჩემპიონების სასარებლოდ ჯარიმა დაინიშნა. ბურთთან რიჩი მო’უნგა მივიდა.  ზელანდილთა მგეზავმა დარტყმაში მთელი თავისი ოსტატობა ჩააქსოვა და საკუთარი გუნდის უპირატესობა 7-ქულიანი გახადა.

71-ე წუთზე აფრიკელები კიდევ ერთხელ დაჯარიმდნენ.   იმ დროისთვის მოედანზე რიჩი მო’უნგა აღარ იმყოფებოდა. ჯარიმის შესრულება კი პროფესიით მგეზავმა და ამ შეხვედრაში ფულბეკის პოზიციაზე მოთამაშე ბოდენ ბარეტმა ითავა.  მისი დარტყმული იუველური სიზუსტით ძელებს შორის გაძვრა.

საბოლოოდ, ახალი ზელანდიის ნაკრებმა 23:10 მოიგო და პირველი ტურის შემდეგ აქტივში 4 ქულა ჩაიწერა.  სამხრეთ აფრიკა კი მრისხანე მეტოქესთან ვერაფერს გახდა და ახლა ქულების დაგროვებას სხვა შეხვედრებში ეცდება.

ახალი ზელანდია 23:13 სამხრეთ აფრიკა

ახალი ზელანდია: 2 ლელო – ჯორჯ ბრიჯი,  სკოტ ბარეტი
2 გარდასახვა: რიჩი მო’უნგა (2)
3 ჯარიმა: რიჩი მო’უნგა (2), ბოდენ ბარეტი

სამხრეთ აფრიკა: ლელო – პიტერ სტეპ დუ ტოიტი
გარდასახვა: ანდრე პოლარდი
ჯარიმა: ანდრე პოლარდი
არეკნი: ანდრე პოლარდი

0 კომენტარი
0

მსგავსი პუბლიკაციები

დატოვეთ კომენტარი