მთავარი მთავარი ლაშა ტალახაძე: ,,თუ 500 კილოგრამი ავწიე, ნახევარ ტონაზე აღარ გავჩერდები და კიდევ მეტის აწევის სურვილი გამიჩნდება!”

ლაშა ტალახაძე: ,,თუ 500 კილოგრამი ავწიე, ნახევარ ტონაზე აღარ გავჩერდები და კიდევ მეტის აწევის სურვილი გამიჩნდება!”

ავტორი კახა მიხანაშვილი
341 ნახვა

,,როცა სოხუმი დაეცა, იმ წელს დავიბადე და ცხადია, არასდროს მინახავს, მაგრამ მინახავს ბევრი ფირი, წამიკითხავს და მომისმენია ბევრი რამ და დღეს ამ ძირძველი ქართული მიწის გარეშე ყოფნა ისევე მადარდებს, როგორც სოხუმში დაბადებულ-გაზრდილ ქართველებს” – აცხადებს გაზეთ “კვირის პალიტრასთან”  მიცემულ  ინტერვიუში ყველა დროის ერთ-ერთი საუკეთესო ქართველი ძალოსანი ოლიმპიური, მსოფლიოსა და ევროპის 4-გზის ჩემპიონი ლაშა ტალახაძე.

ქართველმა ძალოსანმა ტაილანდში 27 სექტემბერს, მოპოვებული მსოფლიოს ჩემპიონის ტიტულის შესახებ, ასევე რამდენიმე საინტერესო თემაზე ისაუბრა.

ლაშა ტალახაძე: ,,ცხადია, ტაილანდში ნაჩვენები შედეგით კმაყოფილი ვარ.  მსოფლიოს ჩემპიონატს მცირე ტრავმით შევხვდი  და მაჯა დღემდე მაწუხებს, მაგრამ ნაკრების ექიმის, გიორგი ჭინჭარაულის დახმარებით ტურნირამდეც მშვიდობით მივედით და ტრავმას ხელი არც შედეგის ჩვენებაში შეუშლია.  რაც შეეხება ტურნირის ორგანიზებას, სავარჯიშო და საშეჯიბრებო დარბაზები კარგი იყო, თუმცა კვებით უკმაყოფილო დავრჩი. ეს მძიმეწონოსანისთვის სულაც არ არის უმნიშვნელო საკითხი.  ტაილანდური კერძები ისედაც არ მიყვარს და არც მათი არჩევანი იყო დიდი – ძალიან ერთფეროვანი მენიუ ჰქონდათ, ამიტომ მის გადახალისებაზე საკუთარი ხარჯებით ვზრუნავდით.

მსოფლიოს ჩემპიონატის შემდეგ ოქტომბერში მხოლოდ ერთი კვირა დავისვენებ, მერე კი მზადებას ნოემბერში გასამართი ტურნირისთვის დავიწყებ.  ოლიმპიადის ლიცენზია გასანაღდებელი მაქვს, რათა ყოველგვარი “სიურპრიზისგან” დაზღვეული ვიყოთ.

ლაშა ტალახაძისთვის შეჯიბრების შემდეგ საუკეთესო ანტიდეპრესანტი ოჯახის წევრებთან ყოფნაა.  მისი აზრით, სპორტსმენისთვის დაოჯახება  კარიერაში ხელისშემშლელი არ არის.

ლაშა ტალახაძე: ,,სიმართლე გითხრათ, სრულად განტვირთვას და დასვენებას მონატრებული ვარ, მაგრამ შეჯიბრების შემდეგ ჩემთვის საუკეთესო ანტიდეპრესანტი ოჯახის წევრებთან ყოფნაა.  მით უმეტეს, მას შემდეგ, რაც მამა გავხდი და შინ პატარა მელოდება.

დაოჯახება სულაც არ მიმაჩნია სპორტსმენისთვის კარიერაში ხელისშემშლელად, პირიქით,  მეტი სტიმული გეძლევა რათა შენი მეუღლე და შვილები გაახარო, შედეგების მხრივაც უკეთესად იყო და ფინანსურადაც. მით უმეტეს, თუ მეორე ნახევარიც ხელს გიწყობს.  გული მწყდება, რომ ოჯახში დიდ დროს ვერ ვატარებ, მაგრამ სულ ვცდილობ, შვილთან ვიყო. ჯერ მხოლოდ გოგონა მყავს და არ ვიცი, როგორია ვაჟის მამობა, აი ქალიშვილს კი საოცარი სიყვარული სცოდნია.  – საუბრობს ოჯახის შესახებ ქართველი ძალოსანი გაზეთ “კვირის პალიტრასთან”.

ლაშა ტალახაძე მიღწეულ შედეგებზე და მწვრთნელების როლზე საუბრობს.  ტიტულოვანი სპორტსმენი აცხადებს, რომ თუ ორჭიდის ჯამში 500 კილოგრამი ასცია, ამაზე არ გაჩერდება და მეტის აწევის სურვილი ექნება.

ლაშა ტალახაძე: ,,სოხუმის დაცემის დღეს მსოფლიოს ჩემპიონატზე წაგების უფლება არ მქონდა.  როცა სოხუმი დაეცა, იმ წელს დავიბადე და ცხადია, არასდროს მინახავს, მაგრამ მინახავს ბევრი ფირი, წამიკითხავს და მომისმენია ბევრი რამ და დღეს ამ ძირძველი ქართული მიწის გარეშე ყოფნა ისევე მადარდებს, როგორც სოხუმში დაბადებულ-გაზრდილ ქართველებს. 27 სექტემბერი ყველა ჩვენთაგანის ტკივილია.  სულ ვცდილობ საკადრისი პატივი მივაგო ჩვენს გმირებს, აფხაზეთსა თუ სამაჩაბლოში დაღუპულ ბიჭებს, რომლებმაც ყველაზე ძვირფასი – სიცოცხლე გაიღეს სამშობლოსთვის! მინდა მალე გამთლიანდეს ჩვენი ქვეყანა, ჩემმა თაობამაც ნახოს აფხაზეთისა და სამაჩაბლოს ულამაზესი ადგილები.

რაც შეეხება მსოფლიოს ჩემპიონატს, ვფიქრობ, ტაილანდში შესაძლებელი იყო, მეცადა ორჭიდის ჯამში ნახევარი ტონის აწევა. მთლად 500-ის თუ არა, ამ ეტაპზე 5-6 კილოგრამით ნაკლების აწევას მაინც შევძლებდი.  ჩემი ორგანიზმი ჯერ კიდევ ჩამოყალიბების პროცესშია, ასაკთან ერთად ძალაც მემატება და ამ მიზანს აუცილებლად მივაღწევ! თუ 500 კილოგრამი ავწიე, ნახევარ ტონაზე აღარ გავჩერდები და კიდევ მეტის აწევის სურვილი გამიჩნდება!  ორჭიდის ჯამში 500 კილოგრამი ყველათვის საოცნებო მაჩვენებელია, მით უმეტეს, ძალოსნობის ისტორიაში 472 იყო საუკეთესო შედეგი, რაც უკვე 12 კილოგრამით გავაუმჯობესე და მჯერა, რომ უფლის წყალობით მეტს შევძლებ!  მთავარია, ჯანმრთელად ვიყო და აუცილებლად ავალთ საოცნებო მაჩვენებლამდე.

როცა სიმძიმეებზეა ლაპარაკი, თითო კილოგრამიც ბევრს ნიშნავს. შეიძლება 200 ასწიო, მაგრამ 201-ს  ვერაფერი მოუხერხო.  დარბაზში 484 კილოგრამიც ამიწევია, 500-ზეც წავიდოდი, მაგრამ მწვრთნელები არ მიშვებენ, არ უნდათ გარისკვა.  გიორგი ასანიძე სულ მეუბნევა, არ ვიჩქაროთ, სჯობს, ნელ-ნელა მივყვეთ, ვიდრე ისეთი შეცდომა დავიშვათ, რაც ცუდად აისახება შენს კარიერაზეო.  კი ვბუზღუნებ, მაგრამ ბოლოს, მაინც ვუჯერებ და მორჩილად ველოდები იმ დროს, როცა უფლებას მომცემენ.

წარმატების მიღწევაში მწვრთნელებს ძალიან დიდი როლი აკისრიათ.  სპორტსმენისთვის მწვრთნელი მარჯვენა ხელია! ათლეტის ნიჭს  სწორედ მან უნდა მისცეს მიმართულება, სწორად გაზარდოს, საჭირო სტრატეგია, დატვირთვები მისცეს.  თუ მეტი არა, მწვრთნელს შეგირდზე არანაკლები დატვირთვა აწევ შეჯიბრების დროს. დიდი პასუხიმგებლობა ეკისრება, რადგან გათვლებისას დაშვებული ერთი პატარა შეცდომა შეიძლება, მარცხის საფუძველი გახდეს.  ერთკვირიანი დასვენების დროს კონდიციების აღდგენას ძალიან დიდი ძალისხმევა სჭირდება და ამ დროს მწვრთნელების როლი განუზომელია.

ნამდვილად არ ვაპირებ, რომელიმე ტურნირი დავთმო, მაგრამ თუ ასე მოხდება, გული არ დამწყდება, ე.ი. რაღაც დავაკელი, კიდევ მეტი უნდა მოვინდომო! სულ ზემოთ სვლა, ალბათ არც არის კარგი, დაცემაც უნდა გამოსცადო, რომ ადგომა ისწავლო.

სპორტში შეიძლება ყველაფერი მოხდეს – ტრავმამ ან სხვა რაღაცამ შეგიშალოს ხელი, მაგრამ, საბედნიეროდ, ჯერ ასეთი ფიქრები არ მაწუხებს.

სულ მობილიზებული ვარ მაქსიმუმის გასაკეთებლად! ყოველი ტურნირის შემდგომ თავიდან ვიწყებ ფიქრს, რომ კიდევ ბევრი მწვერვალია დასაპყრობი. ძალოსანობა სპორტის ისეთი სახეობაა, მოდუნების საშუალებას არ გაძლევს – მცირე უყურადღებობა , იმედგაცრუება ან მეტოქეების შეუფასებლობა საკმარისია, რათა ძალიან დაშორდე კონდიციას, რომლისთვისაც წლების განმავლობაში იბრძოდი.  – აცხადებს მსოფლიოს 4-გზის ჩემპიონი ლაშა ტალახაძე.

ლაშა ტალახაძე თავს გმირად არ მიიჩნევს და აცხადებს, რომ გმირი ის არის ვინც სამშობლოს თავი შესწირა.  ჟურნალისტის სახუმარო კითხვაზე ყველაფერი ასწიე და იქნებ ლარის კურსიც ასწიოო ქართველი ძალოსანი პასუხობს: ,,ოოო, ეს ზალიან რთული იქნება. გაცილებით რთული, ვიდრე ნახევარი ტონის აწევა!

ლაშა ტალახაძე:  ,,ჩემი შედეგებიდან გამომდინარე, შეიძლება ვინმემ ასე იფიქროს, რომ გმირი ვარ მაგრამ… ჩემთვის გმირობა სხვა რამეა, გმირობამდე ჩვენ ბევრი გვიკლია. გმირი ს არის, ვინც სამშობლოს შესწირა თავი!

წყარო: გაზეთი “კვირის პალიტრა”  https://www.kvirispalitra.ge/sport.html

 

0 კომენტარი
0

მსგავსი პუბლიკაციები

დატოვეთ კომენტარი