მთავარი ჭიდაობათავისუფალი 2 ოქროსა და 1 ბრინჯაოს მოლოდინში

2 ოქროსა და 1 ბრინჯაოს მოლოდინში

609 ნახვა

შესაშურად დაიწყო ჩვენთვის უნგრეთის დედაქალაქ ბუდაპეშტში მსოფლიოს პირველობა თავისუფალ ჭიდაობაში. პირველ დღეს მოასპარეზე 4 ფალავნიდან 3-მა ფინალურ ბლოკში ასპარეზობის უფლება მოიპოვა.

დავიწყოთ ოქროსთვის მებრძოლებით:

ტურნირის დებიუტანტს ავთანდილ კენჭაძეს (74კგ) ფინალში ერთობ ანგარიშგასაწევი მეტოქე, ზორბეფ სიდაკოვი ელოდება, რომელმაც თავის გზაზე ორი მოქმედი მსოფლიოს ჩემპიონი – ჯორდან ბაროუზი და ფრენკ ჩამიზო მოინელა. თავის მხრივ არც ავთოს ჰქონია იოლი ბადე. პირველ წრეში აზიის მოქმედ ჩემპიონს, ბეკზოდ აბდურახმონოვს 0-8-დან დაუტრიალა შეხვედრა და 12:12 ქულების დამატებითი მაჩვენებლებით სძლია. 12:2 და 5:2 სძლია პოლონელ ანდრეი სოკალსკისა და აზერბაიჯანელ აბუბაქარ აბაკაროვს, ხოლო ფინალში გადასასვლელ შეხვედრაში თურქთა ევროპის მოქმედი ჩემპიონი სონერ დემირტაში ორთავე ბეჭით გააკრა ხალიჩას და წმინდა გამარჯვება მიითვალა.

მოქმედი ჩემპიონი გენო პეტრიაშვილი (125კგ) ზედიზედ მეორეთ ეცდება მსოფლიოს კვარცხლბეკის უმაღლესი საფეხურიდან გადმოხედოს. ამისათვის კი ჩინელი ჟივეი დენგის ბარიერი აქვს დასაძლევი.

გზად ფინალამდე ჩვენმა დევკაცმა სამი მეტოქე დაამწუხრა. უნგრელ დანიელ ლაგეტის 11:1 მოუმთავრა საქმე,  რუს ანზორ ხიზრიევს 8:5 აჯობა, თვით ტაჰა აკგულის წამქცევი არვიზ ხოდავირდი ჰადიბასმანჯი კი 13:6 დაჯაბნა.

ნახევარფინალამდე ერთი ამოსუნთქვით განვლო გზა ბექა ლომთაძემ (61კგ) – სენეგალელ ადამა დიატას და იაპონელი კიანაგის ჯამში 17 ქულა აუღო, თვითონ კი მხოლოდ 1 გაუშვა. იქ კი ჩვენებურს მსოფლიოს ვიცე და ევროპის ორგზის ჩემპიონი რუსეთიდან, გაჯიმურად რაშიდოვი დახვდა და 10:0 აჯობა. ბრინჯაოისთვის ბექას მეტოქე მონღოლი ტუვშინტულგა ტუმენგილეგი იქნება.

ფინალური ორთაბრძოლები, დღეს, ჩვენი დროით 21:00 საათიდან დაიწყება.

0 კომენტარი
0

მსგავსი პუბლიკაციები

დატოვეთ კომენტარი