მთავარი მთავარი თბილისში პირველი ღია საჭიდაო არენა გაიხსნა

თბილისში პირველი ღია საჭიდაო არენა გაიხსნა

ავტორი კახა მიხანაშვილი
760 ნახვა

თბილისში, ბერი გაბრიელ სალოსის გამზირზე პირველი  ღია საჭიდაო არენა გაიხსნა.    საჭიდაო მრავალფუნქციურია და 500 მაყურებელს იტევს.

პროექტის ფარგლებში, არენის მიმდებარე ტერიტორიაზე სკვერი მოეწყო, სადაც დასასვენებელი სკამები და ურნები განთავსდა, დამონტაჟდა გარე განათების სისტემა დეკორატიული ლამპიონებითა და კედლის ფერადი განათებებით. სკვერში  გამწვანების სამუშაოები ჩატარდა.  განთავსდა საბავშვო ატრაქციონები. არენასა და სკვერში ინფრასტრუქტურა სრულად ადაპტირდა შეზღუდული შესაძლებლობების მქონე პირთათვის.

საჭიდაო არენის მშენებლობისა და სკვერის მოწყობისთვის ისნის რაიონის გამგეობის ბიუჯეტიდან 353 313 ლარი დაიხარჯა.

ნახერხიან საჭიდაოზე ისნის რაიონის გამგეობის ორგანიზებითა და ქართული ჭიდაობის ეროვნული ფედერაციის ხელშეწყობით, ტურნირი „თბილისის ფალავანი 2018“ გაიმართა.

ტურნირზე მონაწილეობა სპორტსმენებმა სამ წონით კატეგორიაში მიიღეს. ჩემპიონ-პრიზიორები  დიპლომებით, მედლებითა და ფასიანი ვაუჩერებით დასაჩუქრდნენ.  ტურნირის საუკეთესო ფალავანს კი, ტრადიციულად ყოჩი გადაეცა.

ღონისძიების ფარგლებში, ქართული ჭიდაობის  ისტორიული საარქივო მასალების ფოტო-გამოფენაც მოეწყო.

ქართული საჭიდაო არენის გახსნის ღონისძიებას მსოფლიო ჩემპიონი ძიუდოში გურამ თუშიშვილი, დედაქალაქის მერის მოადგილე ილია ელოშვილი, ისნის რაიონის გამგებელი კახა ლაბუჩიძე, საკრებულოს თავმჯდომარის მოადგილე გიორგი ახვლედიანი, ისნის რაიონის მაჟორიტარი დეპუტატი პარლამენტარი ირაკლი აბუსერიძე,  თბილისის ჭიდაობის ფედერაციის პრეზიდენტი ვალერი პარუნაშვილი,  ასევე, საკრებულოსა და პარლამენტის  დეპუტატები დაესწრნენ.

საჭიდაო არენის გახსნის ცერემონილზე დედაქალაქის მერის მოადგილემ ილია ელოშვილმა კომენტარი გააკეთა.  მისი აზრით, ეს უდიდესი პროექტია, რომელიც ემსახურება იმას, რომ ახალგაზრდებში ჯანსაღი და სპორტული აღზრდის პრინციპები დაინერგოს.  ასევე კარგი საშუალება, იმისთვის, რომ  მომავალ თაობას ჩვენი ტრადიციები ვაჩვენოთ.

ილია ელოშვილი: „ჩვენი პირველი დიდი ჩემპიონების თაობის გამარჯვების საფუძველში ქართული ჭიდაობის ელემენტები იყო, რითაც მათ შეძლეს, ქართული სპორტისთვის მსოფლიო აღიარება მოეტანათ. დღეს პირველი ქართული ჭიდაობის დარბაზი გაიხსნა, რომლის ანალოგი თბილისში არ არსებობს. ეს უდიდესი პროექტია იმისთვის, რომ ახალგაზრდებში არამხოლოდ ჯანსაღი და სპორტული აღზრდის პრინციპები დავნერგოთ, არამედ მათ ჩვენი ტრადიციები ვაჩვენოთ“, – განაცხადა ილია ელოშვილმა.

წყარო:  თბილისის მერია

0 კომენტარი
0

მსგავსი პუბლიკაციები

დატოვეთ კომენტარი