მთავარი მთავარი დიორის კარი ვერცხლ-ბრინჯაოთი შევაღეთ

დიორის კარი ვერცხლ-ბრინჯაოთი შევაღეთ

233 ნახვა

უნგრეთის ქალაქ დიორში დღეს დაწყებული 23-წლამდელ ძიუდოისტთა ევროპის ჩემპიონატი ვერცხლ-ბრინჯაოთი გავხსენით. ვიცეჩემპიონი ჯაბა პაპინაშვილი (-60) გახდა, მესამე ადგილი კი ეთერ ლიპარტელიანმა (-57) ირგუნა.

უმცროსმა პაპინაშვილმა აქაც საკმაოდ მაღალი დონის ჭიდაობა აჩვენა კიდევ ერთხელ დაამტკიცა, რომ ეროვნული ნაკრების უმჩატეს წონაში მომავალი ლიდერია.

პირველ წრეში ჩვენებური თავისუფალი იყო, შემდეგ კი მიჯრით სამ შეხვედრაში იმარჯვა. ერთი ნახევარფინალში გაუჭირდა რუს დოლგიხთან, რომელშიც გასამარჯვებლად დამატებითი დროის ჭიდაობა დასჭრიდა, თორემ მანამდე მოლდაველ დონცილასა და აზერბაიჯანელ ილეკიევს იპონით მოუმთავრა საქმე. ფინალში ჯაბას პირისპირ რუსეთის სახელით მოასპარეზე იაგო აბულაძე დადგა. ძიუდოისტები წლეულს უკვე იყვნენ ერთხელ შეხვედრილები ანტალიის გრან-პრიზე. მაშინ გამარჯვება ჩვენსას დარჩა, ამჯერად კი ფორტუნა რუსის მხარეს გადაიხარა – შეხვედრის შუაწელში ამოსმულზე მოაყოლა და ვაზარი აართვა, თოთხმეტიოდე წამით ადრე კი, ვაბანგზე წასული, შებოჭვაზეც დაიჭირა.

წლეულს ეს ჯაბასთვის უკვე მესამე მედალია. სექტემბერში ევროპის ახალგაზრდულ ჩემპიონატზეც მესამე იყო, ნოემბერში კი მსოფლიოზე, ასევე მესამე.

მესამე ასაკობრივ კატეგორიაში შეძლო ევროპულ პოდიუმზე ასვლა ეთერ ლიპარტელიანმა.

ქვეჯგუფში ადგილობრივი ვარგასა და ბელგიელი ბრალვიერის ძლევის შემდეგ “ლიპო” ბრიტანელ ნაირნესთან დამარცხდა ვაზარით. დამამშვიდებელში გადართულმა კი ჯერ ხორვატი ობერვანი დაამწუხრა იპონით, შემდეგ გერმანელ ანა შმიდტი შეხვედრის დასრულებამდე 2 წუთითა და 12 წამით ადრე წმინდათ გააკრა ტატამს და ჭაბუკებში და ახალგაზრდებში მოპოვებულ ოქრო-ვერცხლს, 23-წლამდელების ბრინჯაოც დაუმატა.

დღესცე საქართველოს სახელით კიდევ სამი ფალავანი ირჯებოდა – მარიამ ჯანაშვილი (-52), გიორგი ნიაზაშვილი და თორნიკე ნაგლიაშვილი (ორთავე -66), თუმცა მედალს ვერცერთი ვერ შეწვდა.

ჯანაშვილმა და ნიაზაშვილმა მხოლოდ თითო-თითო შეხვედრის მოგება მოახერხეს… მეტი შორს ვეღარ წავიდნენ. რაც შეეხება ნაგლიაშვილს, ნახევარფინალში მომავალ ჩემპიონთან ესპანეთიდან ნინე ლინა ესტეოსტან ილეთის არასწორად შესრულებისთვის პირდაპირ ჰანსოკუ-მაკეთი დასაჯეს და მთლიანად ტურნირიდან მოხსნეს.

 

 

0 კომენტარი
0

მსგავსი პუბლიკაციები

დატოვეთ კომენტარი