მთავარი მთავარი გაგამარუ: ,,დედის გარდაცვალების შემდეგ კარიერის დასრულება დავაპირე, მაგრამ გულშემატკივრებმა დოჰიოზე დაბრუნების ძალა მომცეს”

გაგამარუ: ,,დედის გარდაცვალების შემდეგ კარიერის დასრულება დავაპირე, მაგრამ გულშემატკივრებმა დოჰიოზე დაბრუნების ძალა მომცეს”

ავტორი კახა მიხანაშვილი
863 ნახვა

ქართველი გოლიათი სუმოისტი თეიმურაზ ჯუღელი იგივე გაგამარუ გასულ 2018 წელს გაზეთ “კვირის პალიტრასთან” მიცემულ ინტერვიუში აფასებს.

ქართველი რიკიში აცხადებს, რომ დედის გარდაცვალების შემდეგ დიდი ტრავმა მიიღო და კარიერის დასრულებაზეც ფიქრობდა.  თუმცა გულშემატკივრების თხოვნამ  დოჰიოზე დაბრუნების ძალა მისცა.

გაგამარუ: ,,შარშანდელი სეზონი ჩვენთვის კარგად დაიწყო. ლევანმა იმპერატორის თასის მოგებით ძალიან გაგვახარა. მან მაისის ბაშოზეც წარმატებით იჭიდავა… მე კი მენისკის პრობლემის გამო ჩავარდნა დამეწყო. ყველაზე დიდი ტრავმა კი დედის გარდაცვალებით მივიღე. კარიერის დასრულებაც დავაპირე, მაგრამ გულშემატკივრებმა, მათმა თხოვნამ, იქნებ სცადო და გააგრძელო ვარჯიშიო, დოჰიოზე დაბრუნების ძალა მომცა.

ვინც მენისკს შეუწუხებია, იცის, რა რთული მოსარჩენი ეს ტრავმა, მით უმეტეს ჩემი წონის ადამიანისთვის. გავიჭირვებ და დავიკლებ, მაგრამ ჩვენს სახეობაში წონა აუცილებელია. ასე რომ, ჯერჯერობით ტრავმებით ჭიდაობა ისევ მომიწევს.  არც ქირურგიული ჩარევაა გამოსავალი, რადგან შესაძლოა რამდენიმე კვირაში იმავე პრობლემამ ისევ შემაწუხოს. შევეგუე, რომ შესაძლოა მენისკმა 2-3 კვირის განმავლობაში არ შემაწუხოს, მერე კი მოულოდნელად გამისივდეს ორივე მუხლი და საჭირო სითხის ამოღება გახდეს.

სანამ შევძლებ ბოლომდე დავიხარჯები და ტრავმებსაც გავუძლებ. ყველაფერს აქვს დასაწყისი და დასასრული… ისე, მინდა 2020 წლამდე ვიჭიდავო და ტოკიოს ოლიმპიურ თამაშებს დავესწრო.

მაკუშიტა დივიზიონში დაქვეითების შემდეგ ყველაზე მეტად შავი ქამრის გაკეთება მიჭირდა.  მაგრამ სიამაყის და პირადი პრობლემების გამო გულშემატკივრებს ვერ ვუღალატებდი. სირთულეებთან ერთად მაკუშიტაში გატარებულმა პერიოდმა ბევრი კარგიც მაჩვენა.  თუნდაც ის, როგორ წვალობენ იქ ბიჭები, როგორ უნდა დააფასო ის მდგომარეობა, რომელშიც ხარ.  საერთოდ, როცა კარგად ხარ, ქვევით აღარ იყურები. ამიტომ ხანდახან დაქვეითება აუცილებელია.  სანამ საკუთარ თავზე არ გამოვცადე, ვერ გავაცნობიერე რა მდგომარეობაში იყო ტოჩინოშინი, როცა ფეხის ტრავმის შემდეგ ყოფილი სეკივაკე და კომოსუბი მესამე დივიზიონამდე დაქვეითდა.” – აცხადებს გაზეთ “კვირს პალიტრასთან” სუმოისტი თეიმურაზ ჯუღელი.

ქართველმა მებრძოლმა იაპონურ საახალწლო ტრადიციებზე ისაუბრა.  გაგამარუმ აღნიშნა, რომ ახალ წელს ქართული ღვინო მიირთვა, რომელსაც ტოჩინოშონს ქართველები უგზავნიან.

გაგამარუ: ,,იაპონელები 25 დეკემბერს უფრო ხმაურიანად აღნიშნავენ, თუმცა ახალ წელსაც ზეიმობენ.  ამომავალ მზის ქვეყანაში უმეტესობა ბუდისტია, თუმცა სხვა რელიგიების დღესასწაულებსაც აღიარებენ. პირდაპირ ამბობენ ქრისტიანები არ ვართ,  მაგრამ ისე გვიყვარს კარგი დღესასწაულები, რომ აღმსარებლობას ყურადღებას არ ვაქცევთო.  იაპონურ საახალწლო სუფრაზე აუცილებლად ნახავთ სპაგეტის მსგავს კერძს თოშქოში სობას. ხშირია ოსეჯიც, საახალწლო კერძების ერთგვარი ნაკრები.

იაპონიაში ბავშვებისთვის მცირეოდენი თანხის ჩუქებაა მიღებული. რადგან მათთვის ახალი წლის დადგომა განსაკუთრებული იყოს.

ახალი წლის დღეებში ადამიანები ტოკიოდან მშობლიურ პროვინციებში მიდიან.  იანვრის პირველ დღეს ქალაქში გავედი და ქუჩები ისე უკაცრიელი იყო, რამე რომ დაგჭირვებოდა დამხმარეს ვერ იპოვნიდი.  მრავალ მილიონიან ტოკიოში მანქანაც კი არ დადიოდა.

იაპონელები ახალ წელს მშობლებთან, ბებია-ბაბუებთან, შვილებთან ერთად ხვდებიან.  ამ ქვეყანაში ძალიან აფასებენ ახალგაზრდებს, რომლებიც მამა-პაპის ტრადიციებს იცავენ და მათი წესებით ცხოვრობენ.

სუმოს სამყაროც ჯერ კიდევ ძველი წესებით ცხოვრობს. თუმცა ბოლო წლებში შეღავათებიც დაუშვეს. მაგალითად, ადრე სუმოისტს ტელევიზორი და მობილური ტელეფონი არ უნდა ჰქონოდა, ახლა კი ეს დაშვებულია.  თუმცა ისევ აუცილებელია კიმონოთი და კიკინით სიარული, ასევე აკრძალულია ავტომანქანის მართვა და ა.შ.

ქართველები ახალ წელს ერთად შევხვდით. რა თქმა უნდა, ქართული ღვინო დავლიეთ. იყო, პერიოდი როცა ქართულ ღვინოს ინტერნეტში ვეძებდით, ახლა საბედნიეროდ, ქართული ღვინის იმპორტმა ძალიან მოიმატა. გარდა ამისა, ლევან გორგაძეს იმდენ ღვინოს უგზავნიან, თავს ნამდვილად ვერ მოვაკვლევინებთ და ვერ გავიმეტებთ იმისთვის, რომ ამდენი ღვინო მან მარტო დალიოს. – საუბრობს ქართველი რიკიში გაგამარუ.

ბოლოს კი ქართველი გოლიათი თეიმურაზ ჯუღელი ქართველ ხალხს ახალ წელს ულოცავს:

,, ყველა ქართველს ვულოცავ ახალი წლის დადგომას. მშვიდობას, გაძლიერებას და საქართველოს განმთლიანებას ვუსურვებ.  ყველა სპორტის სახეობების წარმომადგენლებისგან დიდი წარმატების იმედი მაქვს.  რაც შეეხება სუმოს ქომაგებს, წარმატებულ წელს ვუსურვებ ჩვენს თავსაც და მათაც! უფლის წყალობით, იანვრის ბაშოს ორივე სუმოისტი კარგ ფორმაში ვხვდებით და იმედია, წარმატებით ვიჭიდავებთ. ლევანს რამდენიმე დღის წინ ვუთხარი, მეგობარო, იანვრის ბოლოს ერთი წელი სრულდება, რაც იმპერატორის თასი მოიგე და თუ ამ წარმატებას გაიმეორებ, ქართველებს ორმაგად გაახარებ მეთქი.  ჩაეღიმა და არაფერი მიპასუხა.

იმედია, კიდევ გავახარებთ სპოტის მოყვარულებს და ვისაც სპორტი არ უყვარს იმათ შევაყვარებთ!

შარშანდელ იანვართან შედარებით, დღეს საქართველოში სუმო 50 %-ით მეტმა იცის და ეს პატარა საქმე არ არის.  სუმოს ორთაბრძოლებს უკვე ხარაგაულშიც კი ატარებენ. რაც წარმოვიდგენდი, რომ ამას ოდესმე მოცვესწრებოდი…

კიდევ ერთხელ დიდი მადლობა მხარდაჭერისთვის და გპირდებით, რომ ბაშოს პირველივე დღიდან ასპარეზობაში სულით და გულით ჩავერთვები.  ყველანაირად ვეცდები ქართველები გაგახაროთ. ” – აცხადებს თეიმურაზ ჯუღელი გაზეთ “კვირის პალიტრასთან” მიცემულ ინტერვიუში.

თეიმურაზ ჯუღელმა ერთი ბაშოს გამოტოვების შემდეგ ელიტაში ადგილი და სეკიტორის სტატუსი დაიბრუნა.  ქართველი ჰაცუ ბაშოზე ჯურიოს დივიზიონში აღმოსავლეთის მე-14 ნომერი იქნება.

ჰაცუ ბაშო ტოკიოს “რიოგოკუ კოკუგიკანი” სასახლეში, სტარტს 13 იანვრიდან აიღებს. ტურნირი ტრადიციულად 15 დღე გაგრძელდება.

წყარო: გაზეთი “კვირის პალიტრა”   https://www.kvirispalitra.ge/sport.html

 

 

0 კომენტარი
0

მსგავსი პუბლიკაციები

დატოვეთ კომენტარი