მთავარი ჭიდაობაბერძნულ-რომაული ბლაგვი საგნით მოჩხუბარი ფედერაციის პრეზიდენტი და კორცხელის “ზონდერ-ჯგუფები” – რა მოხდა ჭიდაობის ჩემპიონატზე? 

ბლაგვი საგნით მოჩხუბარი ფედერაციის პრეზიდენტი და კორცხელის “ზონდერ-ჯგუფები” – რა მოხდა ჭიდაობის ჩემპიონატზე? 

ავტორი sporter
12658 ნახვა

საქართველოს 2019 წლის ჩემპიონატი ჭიდაობაში მეორე საშეჯიბრო დღეს ჩხუბით დასრულდა. ბერძნულ-რომაული სტილით ჭიდაობაში 87 კგ-ის ფინალი, რომელშიც ერთმანეთს ნაკრების კაპიტანი და ევროპის ორგზის ჩემპიონი ზურაბ დათუნაშვილი და ევროპის ჩემპიონი რობერტ კობლიაშვილი ხვდებოდნენ, ჩაიშალა. მიზეზი მსაჯთა საკამათო გადაწყვეტილება გახდა, როდესაც შეხვედრის მეორე პერიოდში აშკარად აქტიურ დათუნაშვილს ქულა არ მისცეს. უფრო სწორად ორმა მსაჯმა სპორტსმენს შრომა დაუფასა, თუმცა მათი გადაწყვეტილება მესამე მსაჯმა დაბლოკა, რასაც ნაკრების კაპიტნისგან პროტესტი მოყვა.

მსაჯთა ბრიგადასთან მალევე გაჩნდა ფედერაციის წარმომადგენლობა, რომლებიც დათუნაშვილს ჯერ სიტყვიერად დაუპირისპირდნენ, შემდეგ კი ფიზიკურად. საქართველოს ჭიდაობის ეროვნული ფედერაციის პრეზიდენტმა გეგა გეგეშიძემ ნაკრების კაპიტან ზურა დათუნაშვილს ბლაგვი საგნით თავზე ჭრილობა მიაყენა. ჩხუბში აქტიურად მონაწილეობდა ფედერაციის პრეზიდენტის ძმა ლადო გეგეშიძეც, რომელიც ბერძნულ-რომაული სტილით მოჭიდავეთა ნაკრების “კონსულტანტის” მანტიით შემოსილი “რუხი კარდინალია”. მის მიკერძოებულობასთან და არაობიექტურობასთან  დაკავშირებით კითხვები აქამდეც საკმაოდ ხშირად გაჩენილა, თუნდაც შარშანდელ ჩემპიონატზე.

ფედერაციაში ხელმძღვანელობის შეცვლის შემდეგ, საქართველოს არც ერთ ჩემპიონატს ფიზიკური დაპირისპირების გარეშე აღარ ჩაუვლია. ჯერ იყო და 2017 წელს მსოფლიოს ჩემპიონ დავით ბედინაძეს სცემეს, ხოლო გასულ წელს თბილისის ჭიდაობის ფედერაციის გენერალურ მდივან გოჩა ჩორგოლიანს. ეს უკანასკნელი დარბაზში გუშინაც იმყოფებოდა და ფიზიკური დაპირისპირებების შესახებ “სპორტერთან” ისაუბრა:

“ვინც დარბაზში იყო ყველამ დაინახა ჩხუბი ვინ დაიწყო. გეგა და ლადო გეგეშიძეების ზონდერ ბანდის ფორმირების მწვრთნელ წევრები წამოესივნენ ზურაბ დათუნაშვილის ძმას, ზოგი აგინებდა, ზოგი ურტყამდა. ჩემი ყურით გავიგონე, როგორ იგინებოდა გეგა გეგეშიძე და ჩემი თვალით დავინახე სახეში რკინის ბლაგვი სხეული როგორ ჩაარტყა ზურა დათუნაშვილს. ამას ყველაფერს თქვენც დაინახავდით დანარჩენ მაყურებლებთან ერთად, მინიმუმ 500 კაცის თვალწინ ხდებოდა ყველაფერი, ნუთუ 50 კაცს მაინც არ ეყოფა ადამიანობა რომ ამ არაადამიანურ ფარსის დამთავრებას ხელი შეუწყოს და ეს ვაჟკაცი ბიჭებიც შარს და უბედურებას გადავარჩინოთ?” – განაცხადა გოჩა ჩორგოლიანმა.

როგორც ჩანს, ფედერაციის ამჟამინდელი ხელმძღვანელობისთვის საქმეების მუშტი-კრივით მოგვარება უცხო ხილი არაა. უფრო პირიქით, კარგად ნაცადი და დაცდილი პრაქტიკაა. სწორედ მათ სახელთან ასოცირდება ე.წ. “ზონდერ ჯგუფები”, რომლებმაც თავი ყველაზე მეტად კორცხელში არჩევნების დროს გამოიჩინეს. სწორედ ფედერაციის ამჟამინდელ პრეზიდენტ გეგა გეგეშიძეს ღიად ადანაშაულებდა ოპოზიცია, რომ ის ახდენდა “ზონდერ-ჯგუფების” წევრების რეკრუტირებას. ის შინაგან საქმეთა მინისტრის ალექსანდრე ჭიკაიძის დაცვის უფროსი იყო, ახლა კი ჭიკაიძეა ჭიდაობის ფედერაციის ვიცეპრეზიდენტი. 2016 წლის მაისში გაწეული გარჯა “კორცხელის გმირებს” წლის ბოლოს დაუფასდათ და ჭიდაობის ფედერაციაში მაღალი თანამდებობები მიიღეს. არჩევნების დღეს გეგა გეგეშიძემ დელეგატთა “ნდობის მოპოვება” შეძლო და პოსტზე წარმატებულად მოღვაწე ოლიმპიური ჩემპიონი მანუჩარ კვირკველია ჩაანაცვლა. ასევე, კორცხელის ინცინდენტის უშუალო მონაწილეთაგან გიორგი იანტბელიძეს თავისუფალი სტილით მოჭიდავეთა ნაკრების მთავარი მწვრთნელობა ერგო, ვლადიმერ გეგეშიძემ კი ბერძნულ-რომაული სტილით მოჭიდავეთა ნაკრებზე კონტროლი კულისებიდან აიღო.  ფედერაციაში მუშაობა სხვა არაერთმა ზონდერმაც დაიწყო, რომელთაც პოსტებზე გამოჩენილი მოჭიდავეები ჩაანაცვლეს. ნეპოტიზმს შეწირული სახელოვანი სპორტსმენების ნაწილი დღესდღეობით აშშ-ში მშენენებლობაზე, ან თბილისში ტაქსზე მუშაობით ირჩენს თავს.

ფოტო: popsport.com

1 კომენტარი
0

მსგავსი პუბლიკაციები

1 კომენტარი

Jams 12/01/2019 - 09:58

ბიჭს მოგება წაართვეს ამ ჩათლახებმა, თქვე ზონდერებო რის სპორცმენები ხართ მოგებულიც არ გაქვთ არაფერი ნორმალური მაგიტომაც იქეცით ზონდერებად,,

Reply

დატოვეთ კომენტარი