მთავარი მთავარი ავსტრალიის ღია პირველობაზე ჩემპიონობისთვის პეტრა კვიტოვა და ნაომი ოსაკა იბრძოლებენ

ავსტრალიის ღია პირველობაზე ჩემპიონობისთვის პეტრა კვიტოვა და ნაომი ოსაკა იბრძოლებენ

ავტორი კახა მიხანაშვილი
40 ნახვა

2019 წლის პირველი  ,,დიდი მუზარადის”  ტურნირი ავსტრალიის ღია პირველობა დასასრულს მიუახლოვდა.

გოგონათა შორის ერთი გადამწყვეტი, ფინალური შეხვედრა დარჩა ჩასატარებელი.

მელბურნის კორტებზე პრესტიჟული ტურნირის ფინალში WTA-ს რეიტინგის მე-4 ჩოგანი იაპონელი ნაომი ოსაკა და ამავე რეიტინგის მე-6  ჩოგანი ჩეხი პეტრა კვიტოვა იბრძოლებენ.

ამომავალი მზის ქვეყნის შვილმა ოსაკამ,  1/2 ფინალში კიდევ ერთი ჩეხი ჩოგბურთელი WTA-ს რეიტინგის მე-8 ჩოგანი კაროლინა პლიშკოვა დაამარცხა.

ოსაკასა და პლიშკოვას ორთაბრძოლა 1 საათი და 56 წუთი გაგრძელდა და აზიელის გამარჯვებით 6-4, 4-6, 6-4 დასრულდა.

პეტრა კვიტოვამ კი ფინალური მატჩის საგზურის მოპოვება ამ ტურნირის აღმოჩენა დანიელე როუს კოლინზის ძლევით მოახერხა.

გამოცდილ ჩეხ სპორტსმენს მეტოქის დამარცხება არ გასჭირვებია.   მართალია,  კვიტოვამ პირველ სეტში წარმატებას ტაიბრეიკით 7-6 მიაღწია, თუმცა მეორე სეტში მოწინააღმდეგეს პირწმინდად 6-0 მოუგო.

პეტრა კვიტოვა ,,დიდი მუზარადის” ტურნირს შესანიშნავად ატარებს. მას ჯერჯერობით ერთი სეტიც კი არ წაუგია.

გზა ფინალამდე

იაპონელმა ნაომი ოსაკამ ავსტრალიის ღია პირველობაზე გამოსვლა პოლონელი მაგდა ლინეტესთან გამარჯვებით დაიწყო.   შემდეგ კი გზიდან სლოვენიელი თამარა ზიდანშეკი ჩამოიცილა.

ოსაკამ 1/16 ფინალში აზიურ დერბიში ჩინელ სუ-ვეი ჰსიეს მოუგო.    1/8 ფინალში კი დაძაბულ 3-სეტიან ორთაბრძოლაში ლატვიელ ანასტასია სევასტოვას 4-6, 6-3, 6-3 სძლია.

1/4 ფინალში ამომავალი მზის ქვეყნის წარმომადგენელმა უკრანელი ელინა სვიტოლინა ზედმეტი ოფლისღვრის გარეშე 2-სეტში 6-4, 6-1 დაამარცხა.

ჩეხი პეტრა კვიტოვა წლევანდელ ავსტრალიის ღია ჩემპიონატზე უბრალოდ გენიალურად გამოდის.   მან ყველა მეტოქე 2-სეტში გააწბილა და ტურნირიდან გამოთიშა.

კვიტოვას მსხვერპლნი სხვადასხვა ეტაპზე: სლოვენიელი მაგდალენა რიბარიკოვა,  რუმინელი ირინა ბეგუ,  შვეიცარიელი ბელინდა ბენჩიჩი, ამერიკელი ამანდა ანისიმოვა, მასპინძელი ავსტრალიელი ეშლი ბარტი  და ზემოთნახსენები ამერიკელი ტურნირის ნამდვილი აღმოჩენა  დანიელე როუს კოლინზი გახდნენ.

ავსტრალიის ღია პირველობის ფინალში 21 წლის ნაომი ოსაკა და 28 წლის პეტრა კვიტოვა კარიერაში პირველად გავიდნენ.  მათი ფინალური ორთაბრძოლა 26 იანვარს, შედგება.

 

0 კომენტარი
0

მსგავსი პუბლიკაციები

დატოვეთ კომენტარი