მთავარი საქართველოდიდი ათი დრამატულ ბრძოლაში “ბათუმმა” “აიას” სძლია და დიდი 10-ის ჩემპიონატში დამაჯერებლად ლიდერობს

დრამატულ ბრძოლაში “ბათუმმა” “აიას” სძლია და დიდი 10-ის ჩემპიონატში დამაჯერებლად ლიდერობს

ავტორი კახა მიხანაშვილი
26 ნახვა

საქართველოს სარაგბო ჩემპიონატ დიდი 10-ის მე-15 ტურის სასტარტო შეხვედრაში ბათუმში ადგილობრივმა გუნდმა ქუთაისის “აია”  დაძაბულ ბრძოლაში 24-21 დაამარცხა.

მატჩში თავდაპირველად იმერლები დაწინაურდნენ.  მე-7 წუთზე ჯარიმა თედო აბჟანდაძის  არყოფნაში “აიას” მგეზავმა გიორგი თევდორაძემ გაიტანა.  აბჟანდაძე ეროვნულ ნაკრებთან ერთად ბელგიაში იმყოფება და რაგბი ევროპის ჩემპიონატის მატჩისთვის ემზადება.  ამავე მიზეზით ამ მატჩში  ქუთაისელებს მირიან მოდებაძე აკლდათ.  ზღვისპირელებს კი თამაში ლაშა ხმალაძის და  გიორგი თხილაიშვილის გარეშე მოუწიათ.

მე-10 წუთზე ანგარიში გათანაბრდა.  ჯარიმა ბათუმელთა კაპიტანმა მამუკა ნინიძემ გამოიყენა 3-3.

მატჩის პირველი ლელო  მე-18  წუთზე “ბათუმის”  ბურჯმა ზურა ერისთავმა დადო.   გარდასახვისას მიზანს მამუკა ნინიძემ უწია 10-3.

ამის შემდეგ პირველი ტაიმის დასრულებამდე გუნდებმა თითო-თითო ჯარიმა გაცვალეს. ჯენ მამუკა ნინიძემ იხეირა, შემდეგ კი თავისი შანსი ხელიდან არც გიორგი თევდორაძემ გაუშვა. 

ტაიმი “ბათუმმა” 13-6 მოიგო.

43-ე წუთზე იმერლები დაჯარიმდნენ.  საჯარიმო დარტყმა ნინიძემ აუღელვებლად და რაც მთავარია ზუსტად შეასრულა 16-6.

45-ე წუთზე ქუთაისის “აიას” მორაგბემ თემურ კოხოძემ ლელო გაიტანა და სხვაობა შეამცირა.  გარდასახვა თევდორაძემ ამჯერად ვერ გამოიყენა 16-11.

ლელოს გაშვებიდან 2 წუთში აჭარლებმა სტატუსკვო აღადგინეს.   დავით ტრაპაიძის ლელოს შემდეგ ბათუმელები წინ ისევ 10 ქულის სხვაობნით გავიდნენ 21-11.

51-ე წუთზე  ქუთაისელმა გიორგი თევდორაძემ ჯარიმა გაიტანა და თამაშს ინტრიგა დაუბრუნა 21-14.

62-ე წუთზე იმერლები ისევ დაჯარიმდნენ.  ამ მატჩში მამუკა ნინიძემ მორიგი 3 ქულა მიითვალა 24-14.

დარჩენილ დროში “აიამ” კარგად ითამაშა და მათი დამსახურებით მატჩი ბოლო წუთამდე დაძაბულად წარიმართა.

68-ე წუთზე ქუთაისელთა კვაჭმა გოგა კობახიძემ ლელოს დადება მოახერხა. გარდასახვისას კი ბურთი  ძელებს შორის ზუსტად გიორგი თევდორაძემ გააძვრინა 24-21.

ბოლო 12 წუთი ძალიან საინტერესო ბრძოლა გაჩაღდა.  “აიას” მცდელობის მიუხედავად, ბათუმელებმა ანგარიშის შენარჩუნება მოახერხეს.  აქტივში 4 ქულა ჩაიწერეს და უშუალო კონკურენტ თბილისის “ლოკომოტივს” 10 ქულით გაუსწრეს.

“რკინიგზელები” მე-15 ტურის შეხვედრას კვირას, თბილისურ დერბიში “ლელოსთან” ჩაატარებენ.

ქუთაისის “აიას” კი 15 მატჩის შემდეგ 34 ქულა აქვს და მე-4 ადგილზე იმყოფება.

“ბათუმი”  24:21 “აია” (ქუთაისი)

“ბათუმი”: 2 ლელო – ერისთავი, ტრაპაიძე
გარდასახვა:მ.ნინიძე
4 ჯარიმა: მ.ნინიძე (4)

“აია”: 2 ლელო – კოხოძე, კობახიძე
გარდასახვა: თევდორაძე
3 ჯარიმა: თევდორაძე (3)

ფოტო:  ივანე ბაკურაძე

0 კომენტარი
0

მსგავსი პუბლიკაციები

დატოვეთ კომენტარი