მთავარი მთავარი “ბორჯღალოსნები” რაგბი ევროპის ჩემპიონატის მატჩს ბელგიის სამეფოში გამართავენ

“ბორჯღალოსნები” რაგბი ევროპის ჩემპიონატის მატჩს ბელგიის სამეფოში გამართავენ

ავტორი კახა მიხანაშვილი
49 ნახვა

რაგბი ევროპის ჩემპიონატზე მე-3 ტურის მატჩს საქართველოს ნაკრები  სტუმრად ბელგიაში გამართავს.

ბელგიას და საქართველოს ისტორიაში ერთმანეთის წინააღმდეგ 4 მატჩი აქვთ ჩატარებული. ყველა დაპირისპირება “ბორჯღალოსანთა” სასარგებლოდ დასრულდა.

ერთადერთი 2013 წელს პირველ მატჩში გაგვიჭირდა, სადაც ბენელუქსელებს მოკრძალებული ანგარიშით  17:13 ვძლიეთ.  მომდევნო წელს ბელგია თბილისში მშრალი ანგარიშით 35:0 დავამარცხეთ.  2017 წელს კი ქართველებმა გასვლაზე 31:6  გაიმარჯვეს.

ამ გუნდებს შორის ყველაზე დიდი ანგარიში გასულ წელს თბილისში დაფიქსირდა. “ბორჯღალოსნებმა” მეტოქე დაიბრიყვეს და  47:0 მოუგეს.

ქართულ-ბელგიური ურთიერთშეხვედრების ისტორიაში ჩვენმა ნაკრებმა 19 ლელო დადო. თავად კი ერთადერთი ლელო მიიღო.

ქულათა ბალანსი კი საქართველოს სასარგებლოდ   130:19-ზე გახლავთ.

განვლილი ორი ტურის შემდეგ საქართველოს ეროვნულ ნაკრებს 100 %-იანი შედეგი აქვს. “ბორჯღალოსნებმა”  ჯერ რუმინეთი კლუჟში 18:9 დაამარცხეს, შემდეგ კი თბილისში “ავჭალის” სტადიონზე ესპანეთის ნაკრებს  24:10 სძლიეს.

ბელგიამ პირველი შეხვედრა შინ, გერმანიას 29:22 მოუგო.   აღსანიშნავია, რომ ბენელუქსელებს საკუთარ კედლებში უკვე  ზედიზედ სამი მატჩია, რაც არ წაუგიათ.

რაგბი ევროპის ჩემპიონატის მე-2 ტურში კი ბელგია რუსეთში  7:64 განადგურდა.

ამ შეხვედრისთვის ეროვნულ გუნდში სასიამოვნო სიახლეებია.  ტრავმის შემდეგ გუნდის კაპიტანი მერაბ შარიქაძე  და სოსო მათიაშვილი გვიბრუნდება.   რაგბი ევროპის ჩემპიონატის წლევანდელ გათამაშებაში პირველად ინგლისური “ვოსპსის” ბურჯი ზურაბ ჟვანია ითამაშებს.

ერთგვარი საიუბილეო მატჩი ნაკრების მეორეხაზელ ნოდარ ჭეიშვილს ექნება. იგი “ბორჯღალოსანთა” კვართით მე-20 შეხვედრას ჩაატარებს.

2-წლიანი პაუზის შემდეგ ძირითად შემადგენლობაში პირველად ჰავბეკის პოზიციაზე თბილისის “ლოკომოტივის” მორაგბე გიორგი ბეგაძე დადგება. მას მარქაფიდან ტრავმა მოშუშებული გელა აფრასიძე ჩაანაცვლებს.

ბელგიელებთან მატჩში მილტონ ჰეიგმა ამჯერად არცერთ დებიუტანტ არ უხმო. თუმცა ეროვნული გუნდის კვართს მეორედ 18 წლის კვაჭი ვანო კარკაძე და ბექა საღინაძე მოირგებენ.

საქართველოს ნაკრების შემადგენლობა ბელგიის წინააღმდეგ ასეთია:

15. სოსო მათიაშვილი (“ლელო სარანსენსი”),  14. მირიან მოდებაძე (“აია”), 13. მერაბ შარიქაძე კაპ. (“ორიაკი”, საფრ.), 12.  გიორგი კვესელაძე (“არმაზი”),  11. ზურაბ ძნელაძე (“ლოკომოტივი”), 10. თედო აბჟანდაძე (“აია”), 9. გიორგი ბეგაძე  (“ლოკომოტივი”);

1.გურამ გოგიჩაშვილი (“რასინგი”,  საფრ.), 2. შალვა მამუკაშვილი (“ენისეი”, რუსეთი),  3. ლევან ჩილაჩავა (“მონპელიე”, საფრ.), 4. ნოდარ ჭეიშვილი (“ქორნიშ პაირატსი”, ინგლ.), 5. გიორგი ნემსაძე (“ოსპრეიზი”, ინგლ.), 6. გიორგი თხილაიშვილი (“ბათუმი”), 7. გიორგი ცუცქირიძე (“ორიაკი”, საფრ.), 8.  ოთარ გიორგაძე (“ბრივი”საფრ.).

მარქაფა
23. გიორგი აფციაური (“ლოკომოტივი”), 22. ლაშა ხმალაძე (“ბათუმი”), 21. გელა აფრასიძე (“მონპელიე”, საფრ.);
16. ვანო კარკაძე (“ორიაკი”, საფრ.), 17. ზურაბ ჟვანია (“ვოსპსი”, ინგლ.), 18. ბექა გიგაშვილი (“გრენობლი”, საფრ.), 19. შალვა სუთიაშვილი (“ანგულემი”, საფრ.), 20. ბექა საღინაძე (“ორიაკი”, საფრ.)

ბელგიისა და საქართველოს ნაკრების ბრძოლა ბენელუქსური ქვეყნის სამეფოს დედაქალაქ ბრიუსელში შედგება.

მატჩი სტარტს თბილისის დროით 19:00 საათზე აიღებს.

შეხვედრის პირდაპირი რეპორტაჟის ხილვა საზოგადოებრივი მაუწყებლის ,,პირველ არხზე” და ,,რაგბი ტვ” არის შესაძლებელი.

ფოტო: Georgian Rugby

0 კომენტარი
0

მსგავსი პუბლიკაციები

დატოვეთ კომენტარი