მთავარი საქართველოეროვნული ნაკრები ქართული სარაგბო გაკვეთილი ბელგიელებისთვის – “ბორჯღალოსნებმა” “შავი ეშმაკები” გაანადგურეს

ქართული სარაგბო გაკვეთილი ბელგიელებისთვის – “ბორჯღალოსნებმა” “შავი ეშმაკები” გაანადგურეს

ავტორი კახა მიხანაშვილი
66 ნახვა

რაგბი ევროპის ჩემპიონატის მე-3 ტურის შეხვედრაში საქართველოს ეროვნულმა ნაკრებმა ბელგიის სამეფოში გაილაღა და მეტოქე გამანადგურებელი ანგარიშით 46-6 დაამარცხა.

ბრიუსელში გამართულ შეხვედრაში საქართველოს ნაკრებმა მეტოქეს თავიდანვე შეუტია და ქულების მოგროვება მშვიდად დაიწყო.

მილტონ ჰეიგის დავალებით ქართველები ხელდახელ თამაშობდნენ და მწვავე იერიშების განხორციელებასთან ერთად თამაშს ამ კომპონენტშიც ხვეწდნენ.

შეხვედრის პირველი ლელო მე-11 წუთზე “ბორჯღალოსანთა” ბურჯმა გურამ გოგიჩაშვილმა გაიტანა. ფრანგული “რასინგის” მორაგბემ მეტოქის ხაზი კარგად გაჭრა და თავისი ძალის წყალობით ბელგიელებმა მისი შეჩერება ვერ მოახერხეს. ეს ეროვნულ ნაკრებში გოგიჩაშვილის სადებიუტო ლელო გახლავთ. სოსო მათიაშვილმა გარდასახვა ვერ გამოიყენა 0-5.

24-ე წუთზე “ბორჯღალოსნებმა” ბელგიელთა ჩათვლის მოედნიდან დაახლოვებით 10-მეტრის მოშორებით დერეფანი მოიგეს და მოწინააღმდეგეს მიაწვნენ.
ბურთი საქართველოს ნაკრების ვიცეკაპიტანს გიორგი ნემსაძეს მიუვიდა. მან ინდივიდუალური ოსტატობის წყალობით ბელგიელი მორაგბეები აქეთ-იქით მიმოფანტა და ოვალური მასა დაამიწა.
ამჯერად გარდასახვა მათიაშვილმა ზუსტად დაარტყა 0-12.

რიგით მე-3 და მე-4 ლელო ქართველების ლამაზად ხელდახელ გათამაშებულ კომბინაციას მოჰყვა.

ჯერ იყო და 27-ე წუთზე “ბორჯღალოსანთა” მესამეხაზელმა გიორგი ცუცქირიძემ იხეირა.
35-ე წუთზე კი ულამაზესი კომბინაცია ლოგიკურად, ლელოთი მირიან მოდებაძემ დაასრულა.
მათიაშვილმა ორიდან ერთი გარდასახვა გაიტანა.
ქართველები წინ 22-0 გაიჭრნენ.

ერთადერთი რაც მასპინძლებმა პირველ ტაიმში მოახერხეს, მათი 13 ნომრის დე მოფარტსის  მიერ გატანილი ჯარიმა იყო.

ტაიმი საქართველომ 22-3 მოიგო.

მეორე ტაიმში ქართველების შეცდომას ჯარიმა მოჰყვა. ბელგიელმა დე მოფარტსიმ ბურთი კარში დაარტყა და ანგარიში შეამცირა 6-22.

ბენელუქსელები 63-ე წუთამდე გაგვიძალიანდნენ. უფრო სწორად რამდენიმე ეპიზოდში ქართველებმა ლელოს დადებისას დამაგვირგვინებელ ფაზაში ვერ ივარგეს.

სამაგიეროდ ბოლო 17 წუთში “ბორჯღალოსნებმა”  ისევ გაიბრწყინეს და მეტოქეს კიდევ 4 ლელო დაუდეს.

ჯერ იყო და ზურაბ ძნელაძემ ნაკრებში სადებიუტო ლელო გაიტანა.  შემდეგ კი დუბლი გიორგი ცუცქირიძემ შეასრულა.

საქართველოს ნაკრების ტრავმა მოშუშებული ჰავბეკი გელა აფრასიძე მარქაფიდან თამაშში შესანიშნავად ჩაერთო.  მან ლელოც გაიტანა და ოთხიდან ორი გარდასახვაც ზუსტად შეასრულა.

გაწითლებულ დროზე “ბორჯღალოსნებმა” შერკინების უფლება მოიპოვეს. მეტოქე დააჯარიმეს და ბურთი კიდეზე გადაიტანეს.

დერეფანში ისევე, როგორც ყველა სარაგბო კომპონენტში ჩვენმა გუნდმა ამ მატჩი მოწინააღმდეგეს აჯობა. მათ არც ბოლო დერეფნის მოგება გასჭირვებით.  ბურთის ატაცების შემდეგ ქართველები მოწინააღმდეგეს მძლავრად მიაწვნენ და მიზანსაც მიაღწიეს. შეხვედრის ბოლო ლელო გიორგი თხილაიშვილმა გაიტანა. ეს ლელო “ბათუმის” მორაგბისთვის ეროვნულ გუნდში რიგით მე-11 გამოდგა.

საბოლოოდ “ბორჯღალოსნებმა”  46-6 მოიგეს.  აქტივში 5 ქულა ჩაიწერეს და რაგბი ევროპის ჩემპიონატის ჯგუფის ლიდერობა შეინარჩუნეს.

ბელგია 6-46 საქართველო

ბელგია: 2 ჯარიმა – დე მოფარტსი

საქართველო: 15. სოსო მათიაშვილი,  14. მირიან მოდებაძე,  13. მერაბ შარიქაძე კაპ, 12.  გიორგი კვესელაძე,   11. ზურაბ ძნელაძე, 10. თედო აბჟანდაძე,  9. გიორგი ბეგაძე;

1.გურამ გოგიჩაშვილი, 2. შალვა მამუკაშვილი,  3. ლევან ჩილაჩავა, 4. ნოდარ ჭეიშვილი, 5. გიორგი ნემსაძე,  6. გიორგი თხილაიშვილი,  7. გიორგი ცუცქირიძე,  8.  ოთარ გიორგაძე.

მარქაფა
23. გიორგი აფციაური, 22. ლაშა ხმალაძე, 21. გელა აფრასიძე;
16. ვანო კარკაძე,  17. ზურაბ ჟვანია,  18. ბექა გიგაშვილი, 19. შალვა სუთიაშვილი,  20. ბექა საღინაძე
8 ლელო: გოგიჩაშვილი, ნემსაძე, ცუცქირიძე (2), მოდებაძე, ძნელაძე, აფრასიძე, თხილაიშვილი.
3 გარდასახვა: მათიაშვილი, აფრასიძე (2)

ფოტო: geogian rugby

 

0 კომენტარი
0

მსგავსი პუბლიკაციები

დატოვეთ კომენტარი