მთავარი საქართველოეროვნული ნაკრები განადგურებული “ეშმაკები”, სადებიუტო ლელოები და ლიდერობა რაგბი ევროპის ჩემპიონატზე

განადგურებული “ეშმაკები”, სადებიუტო ლელოები და ლიდერობა რაგბი ევროპის ჩემპიონატზე

ავტორი კახა მიხანაშვილი
141 ნახვა

საქართველოს ეროვნულმა ნაკრებმა რაგბი ევროპის საჩემპიონო მარათონის კიდევ ერთი ბარიერი გადალახა.

“ბორჯალოსნებმა” ბელგიელები სტუმრად 46-6 დაამარცხეს და ისევ სატურნირო ცხრილის სათავეში იმყოფებიან.

ქართველებმა ბენელუქსელების ჩათვლის მოედანში 8 ლელოს დადება მოახერხეს და აქტივში ერთი ბონუს-ქულაც ჩაიწერეს.  ჩვენმა დამრტყმელებმა 8-დან მხოლოდ 3 გარდასახვის გამოყენება შეძლეს.

ეროვნული ნაკრების რიგებში სადებიუტო ლელოები ფრანგული “რასინგის” ბურჯმა გურამ გოგიჩაშვილმა და თბილისის “ლოკომოტივის” გარემარბმა ზურაბ ძნელაძემ გაიტანეს.

გურამ გოგიჩაშვილს ეროვნული გუნდში პირველი ლელოს დასადებად სულ 4 სანაკრებო კეპის მოხვეჭა დასჭირდა. ძნელაძემ კი საცადელს მე-7 მატჩში მიაღწია.

ბელგიასთან შეხვედრაში დუბლი ფრანგული “ორიაკის” მორაგბემ გიორგი ცუცქირიძემ შეასრულა.  ეს ლელოები ცუცქირიძისთვისაც ეროვნულ ნაკრებში სადებიუტო გახლდათ.

ლელოების ანგარიში საქართველოს ნაკრებში ქუთაისის “აიას” მორაგბემ მირიან მოდებაძემაც გახსნა.  მან პირველი ლელოს დადება ეროვნულ გუნდში მე-6 თამაშისას მოახერხა.

სამაგიეროდ გამოცდილმა “ბორჯღალოსნებმა”  ნაკრების ვიცეკაპიტანმა გიორგი ნემსაძემ და გიორგი თხილაიშვილმა “შავ ეშმაკებთან” მატჩში თავისი ლელოების მარაგი გაზარდეს.

ნემსაძემ ნაკრების რიგებში მე-13 ლელო გაიტანა. “კოკის” დადებულმა ლელოების რიცხვმა 11-ს უწია.

ნაკრების სათადარიგო ფულბეკმა გელა აფრასიძემ შეხვედრა შესანიშნავად ჩაატარ. მან 7 ქულის მოგროვა შეძლო.  “მონპელიეს” მორაგბის ანგარიშზე 1 ლელო და 2 ზუსტი გარდასახვაა.

საქართველოს ნაკრებმა ბელგიის გუნდი მეხუთედ დაამარცხა. “ბორჯღალოსნებს” “შავ ეშმაკებთან” არცერთი წაგება არ აქვთ.  ჩვენმა გუნდმა ბელგიელების საშინაო კედლებში 3-მატჩიანი დაუმარცხებელი სერია შეწყვიტა.

“ბორჯღალოსნები” 3 ტურის შემდეგ 13 ქულით რაგბი ევროპის ჩემპიონატის ლიდერები არიან.  მეორე ადგილზე 10 ქულით რუსეთის ეროვნული ნაკრები იმყოფება.  რუსმა “დათვებმა” მე-3 ტურში გერმანიის ნაკრებს  26-18 მოუგეს.

დარჩენილ ორ მატჩში წარმატების შემთხვევაში საქართველოს ნაკრები რაგბი ევროპის ჩემპიონის ტიტულს (იგივე ერთა თასი) მეთერთმეტედ დაისაკუთრებს.

დღეს, კი ერთმანეთს ესპანეთი და რუმინეთი დაუპირისპირდებიან.

სატურნირო ცხრილში ამ დროისთვის ვითარება ასეთია:

  1. საქართველო  3  3  0  0 88:25  13
  2. რუსეთი 3  2  0  1 104:41 10
  3. რუმინეთი 2  1  0  1  47:28  5
  4. ესპანეთი  2  1  0  1  26:38  4
  5. ბელგია 3   1  0  2  42:132  4
  6. გერმანია 3  0  0  3  50:93 1

მე-4 ტური
9 მარტი
რუმინეთი : რუსეთი
10 მარტი
ესპანეთი : ბელგია
საქართველო : გერმანია

მე-5 ტური
17 მარტი
ბელგია : რუმინეთი
გერმანია : ესპანეთი
რუსეთი: საქართველო

ფოტო: გუგა როგავა

0 კომენტარი
0

მსგავსი პუბლიკაციები

დატოვეთ კომენტარი