მთავარი საქართველოეროვნული ნაკრები დავით კაჭარავა: ,,მნიშვნელოვანია თამაშის ხარისხი გავაუმჯობესოთ და მსოფლიოს თასს ფორმის პიკში შევხვდეთ”

დავით კაჭარავა: ,,მნიშვნელოვანია თამაშის ხარისხი გავაუმჯობესოთ და მსოფლიოს თასს ფორმის პიკში შევხვდეთ”

ავტორი კახა მიხანაშვილი
46 ნახვა

რაგბი ევროპის ჩემპიონატის მე-4 ტურის მატჩისთვის საქართველოს ეროვნული ნაკრები  „შევარდენის“ სანაკრებო ბაზაზე ემზადება.

დღეს, “ბორჯღალოსნებმა”  გულშემატკივრებისა და ქომაგებისთვის  ღია ვარჯიში გამართეს.  ვარჯიში  2 საათი გაგრძელდა, მისი დასრულების შემდეგ კი, მწვრთნელებმა და მორაგბებმა გერმანიასთან მომავალ მატჩზე ისაუბრეს.

საქართველოს ნაკრების მწვრთნელი ლევან მაისაშვილი აცხადებს, რომ ჩვენმა ნაკრებმა ინგლისში შრომატევადი და ნაყოფიერი შეკრება გაიარა.  მეტოქის შეფასებისას კი აღნიშნავს, რომ გერმანია ბელგიაზე უფრო ძლიერი ნაკრებია.

ლევან მაისაშვილი: „ბელგიასთან თამაშის წინ, ინგლისში შრომატევადი და ნაყოფიერი შეკრება გავიარეთ. ახლა გერმანიასთან სათამაშოდ ვემზადებით, რომელიც, სავარაუდოდ, ბელგიაზე უფრო ძლიერი ნაკრებია, მაგრამ ეს არაფერს ცვლის. ჩვენ მეტოქის ძლიერი და სუსტი მხარეები გავაანალიზეთ, თუმცა უფრო მეტად ჩვენი თამაში გვაინტერესებს, როგორც დაცვაში, ასევე შეტევაში. მნიშვნელოვანია, რომ ორივე კომპონენტში ვდომინირებდეთ“.

მორაგბეებმა მომავალი თამაშისთვის მზადებაზე და მატჩების ქუთაისში ჩატარების მნიშვნელობაზე ისაუბრეს.

გიორგი (კოკი) თხილაიშვილი: „მეტოქე ძლიერთა კატეგორიას არ განეკუთვნება, თუმცა ჩვენი სურვილია, რომ სწორი თამაში ვაჩვენოთ, მწვრთნელთა მონახაზში ჩავჯდეთ და მაყურებელი ვასიამოვნოთ. ძალიან კარგია, რომ ეს შეხვედრა ქუთაისში იმართება და იქაურ გულშემატკივარს გავახარებთ. მათგან დიდ მხარდაჭერას ველოდებით და კარგი იქნება, თუ ქუთაისში ხშირად ვითამაშებთ. საკადრო პრობლემები არ გვაქვს, თუმცა ვფიქრობ, შემადგენლობაში გარკვეული ცვლილებები იქნება“.

დავით კაჭარავა: „გერმანიასთან ბევრჯერ გვითამაშია და მისგან რაიმე სიურპრიზებს არ ველოდებით. რა თქმა უნდა ფავორიტი საქართველოა და ჩვენი მიზანი გამარჯვებაა. გარდა ამისა, მსოფლიო თასამდე სულ რამდენიმე თამაში დაგვრჩა და ძალიან მნიშვნელოვანია ყოველი მომდევნო შეხვედრისთვის გავაუმჯობესოთ ხარისხი, დავხვეწოთ ყველა დეტალი და მსოფლიო თასს ფორმის პიკში შევხვდეთ.

ძალიან კარგია გერმანიას ქუთაისში რომ ვმასპინძლობთ, რადგან რეგიონებში ადგილობრივი მაყურებელი მოდის, რომელთაც დედაქალაქში ჩამოსვლის შესაძლებლობა არ აქვთ და მოედანზე ჩვენი ხილვით, დიდ სიამოვნებას საკუთარ ქალაქში იღებენ. მით უმეტეს, რომ ქუთაისი სარაგბო ქალაქია და ვფიქრობ, ეროვნული ნაკრებისთვის ასეთი გასვლები აუცილებელია.

რუსეთთან თამაშს საქართველოშიც და იქაც ყველა ელოდება, რადგან ჩვენთან შეხვედრა მათთვისაც განსაკუთრებული მოვლენაა. ეს ერთგვარი ფინალი იქნება, თუმცა ჯერ გერმანია გვყავს დასამარცხებელი“.

გიორგი ბეგაძე: „შევეცდებით, რომ გერმანიას სწრაფი, ლაღი და გაშლილი თამაში დავუპირისპიროთ. ისე, როგორც ბელგიასთან, აქაც ვეცდებით, რომ ჩვენი ნახევრიდანაც ხელით შევუტიოთ. მოვუწოდებ ქუთაისელ გულშემატკივარს, მოვიდეს სტადიონზე და ჩვენ მათ ლამაზ თამაშს შევთავაზებთ. ამ ტურნირს მსოფლიო თასისთვის მოსამზადებლად ვიყენებთ და ვფიქრობ, ეტაპობრივად ყველა კომპონენტში ვუმატებთ. რა თქმა უნდა, იდეალურამდე ჯერ შორს ვართ, მაგრამ დრო გვაქვს და მსოფლიო თასამდე ამ დეტალებსაც დავხვეწავთ“.

საქართველოსა და გერმანიის მატჩი  ქუთაისში, 10 მარტს გაიმართება.  მატჩი 16 საათზე დაიწყება.

წყარო: საქართველოს რაგბის კავშირი
ფოტო:  გოგიტა ბუხაიძე

0 კომენტარი
0

მსგავსი პუბლიკაციები

დატოვეთ კომენტარი