მთავარი ვიდეო ახალგაზრდებმა უსტერში გაილაღეს [VIDEO]

ახალგაზრდებმა უსტერში გაილაღეს [VIDEO]

532 ნახვა

დიდი წარმატებით იასპარეზა საქართველოს ვაჟ ძიუდოისტთა ნაკრებმა ამ უქმეებზე შვეიცარიის ქალაქ უსტერში გამართულ ევროპის თასზე. ჩვენებმა იქ 7 მედალს მოუყარეს თავი – 4 ოქროს, 2 ვერცხლსა და 1  ბრინჯაოს და საერთო გუნდურ ჩათვლაში ყველა უკან მოიტოვეს. ბოლო დღეს საერთოდაც 8 ფინალისტიდან 6 ქართველი იყო. აღსანიშნავია, რომ ეს ტურნირი უფროსებს შორის ტარდებოდა, ჩვენგან კი სულ ახალგაზრდული ნაკრების წევრები გამოდიოდნენ – 18-19 წლის ბიჭები, რომელთა აბსოლუტურ უმრავლესობას დებიუტი ჰქონდა ამ ასაკში, მაგრამ აქეთ-იქით მიყარ-მოყარეს ყველა.

ჩემპიონები ვლადიმერ ახალკაცი (-81), ლაშა ბექაური (-90), გიორგი ბერიაშვილი (-100) და ამირან წიქორიძე (+100) გახდნენ. ვერცხლი იმედა გოგოლაძესა (-90) და გიორგი ჩიქოვანს (-100) ერგოთ, ბრინჯაო კი გიორგი ჩიხელიძეს (-73) ხვდა წილად.

ევროპის მოქმედ ჩემპიონს 23 წლადელებში ახალკაცს არცერთი შეხვედრა არ უჭიდავია წუთნახევარზე მეტი ხანი.

4 პაექრობის მოგებას 4 წუთზე ოდნავ მეტი მოანდომა – შვეიცარიელ სიმონ გაუჩის 11 წამი აკმარა, ჰოლანდიელ კოენ ვან ვინდენს წუთი და 11, გერმანელი იანოშ ჰუნფელდს წუთი და 6 წამში დააიპონა, ფინალში კი ფრანგი იბრაჰიმ კეიტას ორჯერ ვაზარიზე დაგდება წუთსა და 27 წამში მოახერხა.

თანამემამულეს არც ბექაური ჩამორჩა. ჭაბუკებში და ახალგაზრდებში მსოფლიოს ჩემპიონმა ყველაზე დიდხანს ფინალი იჭიდავა იმედა გოგოლაძესთან – ჯერ ვაზარი აართვა გუნდელს, მერე კი შეხვედრის დასრულებამდე 5 წამით ადრე მესამე შიდო მიაღებინა. მანამდე ბექაურმა ოთხი პაექრობა გამართა და ოთხთავეში დამაჯერებლად იმარჯვა. მათგან გამოსარჩევი  პოლონელ მარცინ პარტიკასთანდა ფრანგ იანის ჯერეროსთან ჭიდაობა იყო – ერთი 13 წამში გააკრა ტატამს, მეორე კი 18-ში.

ფინალამდე ასევე იპონებით მივიდა გოგოლაძეც – შვეიცარიელ, ფრანგ გერმანელ და ჰოლნადიელ მეტოქეებს ისე გაუსწროდა ქულა რომ ქულაა ისიც კი არ გაუშვია.

კიდევ ერთი ქართული ფინალი 100 კგ-ში შედგა, სადაც გიორგი ბერიაშვილმა ვაზარით იმარჯვა გიორგი ჩიქოვათან. საოქროვე შეხვედრამდე ორთავემ 3-3 მეტოქე დაამარცხა. ბერიაშვილმა თავიდან იტალიელი მარია და გერმანელი დრილერი მოახსნევინა გაფრთხილებებით, მერე კი ფრანგ ნიკოლას პავლოვსკისთან ვაზარით ჩამორჩენა უკანასკნელ წამს შესრულებული იპონით აღმოფხვრა. რაც შეეხება ჩიქოვანს, მან საწყის ეტაპზე დანიელი აიხს მოუგო, შემდეგ შვედი ემილ მატსონი დააიპონა, ნახევარფინალში კი პოლონელ სჟუროვსკის 3 გაფრთხილება მიაღებინა.

ჩვენებიდან ყველაზე სწრაფი იპონი წიქორიძის ანგარიშზეა – ნახევარფინალში ხორვატი მარტო კურმიჩი 11 წამში დადო ბეჭებზე. მანამდე კი ფრანგ კაილონს მოუგო წმინდათ, ხოლო ფინალში ჰოლანდიელ ვან კამპენს აჯობა დამატებით დროში შესრულებული ვაზარით.

უფროსებში საქართველოს მესამე პრიზიორმა ჩიხელიძემ ოქროსკენ სხვა ნახევარფინალში შეწყვიტა – მომავალ ჩემპიონ შვეიცარიელ ნაიმ მატთან დამარცხდა.  ქვეჯგუფში გიორგი სამი მეტოქე დაამარცხა – ავსტრიის სახელით მოჭიდავე ვაჰიდ ბორჩაშვილი ვაზარით, შვეიცარიელ სირო სტუმპი და გერმანელ ლუკაშ ვენეკოლდი კი იპონით. ასევე ვადაზე ადრე იმარჯვა ბრინჯაოსთვის შეხვედრაში – ესპანელი ლუის მარტინეს ვასკესი  გაფრთხილებებით მოახსნევინა.

თამამად შეგვიძლია ვთქვათ, რომ ქართული ძიუდოს მომავალი ნათელია!

 

81 კგ-ის ოქროს ფინალი:

ვლადიმირ ახალკაცი (საქართველო) Vs იბრაჰიმ კეიტა (საფრანგეთი)

 

90 კგ-ის ოქროს ფინალი:

იმედა გოგოლაძე (საქართველო) Vs ლაშა ბექაური (საქართველო)

 

100 კგ-ის ოქროს ფინალი:

გიორგი ბერიაშვილი (საქართველო) Vs გიორგი ჩიქოვანი (საქართველო)

 

+100 კგ-ის ოქროს ფინალი:

ამირან წიქორიძე (საქართველო) Vs სტეფ ვან კამპენი (ჰოლანდია)

 

73 კგ-ის ბრინჯაოს ფინალი:

გიორგი ჩიხელიძე (საქართველო) Vs ლუის მარტინეს ვასკესი (ესპანეთი)

0 კომენტარი
0

მსგავსი პუბლიკაციები

დატოვეთ კომენტარი