მთავარი მსოფლიოგერმანია “ბარსელონა” ჩემპიონთა ლიგის 1/2 ფინალს მიუახლოვდა – გასული წლის ფინალისტების ორთაბრძოლა “ლიონმა” მოიგო

“ბარსელონა” ჩემპიონთა ლიგის 1/2 ფინალს მიუახლოვდა – გასული წლის ფინალისტების ორთაბრძოლა “ლიონმა” მოიგო

ავტორი კახა მიხანაშვილი
99 ნახვა

ფეხბურთში ქალებს შორის უეფას ჩემპიონთა ლიგის 1/4 ფინალური სერიის პირველი მატჩები გაიმართა.

ჩეხეთის დედაქალაქ პრაღაში ადგილობრივი “სლავია” მიუნხენის “ბაიერნს” დაუპირისპირდა.

პირველი უგოლო ტაიმის შემდეგ ანგარიში 62-ე წუთზე ბავარიელთა შვედმა ლეგიონერმა
ფრიდოლინა როლფომ გახსნა.
ჩეხურმა კლუბმა წონასწორობა 74-ე წუთზე აღადგინა. გოლი “სლავიას” ფორვარდმა
კატერინა სვიტკოვამ გაიტანა.
საბოლოოდ მატჩი ფრედ 1-1 დასრულდა. 1/2 ფინალისტის ვინაობა მიუნხენში გასამართ მეორე ბრძოლაში გაირკვევა.

სამაგიეროდ, “ბარსელონამ” ორმატჩიანი სერიის ბედი თითქმის გადაწყვიტა. კატალონიელებმა ნორვეგიული “კვინერი” 3-0 დაამარცხეს და განმეორებითი შეხვედრისთვის მშვენიერი განწყობა შეიქმნეს.

პირველ 24 წუთში დუბლი “ბარსელონას” ინგლისელმა თავდამსხმელმა ტონი დუგანმა შეასრულა.
38-ე წუთზე კი მარიონა კალდენტეიმ პენალტიც გაიტანა და ტაიმი ესპანურმა კლუბმა 3-0 მოიგო.
მეორე ნახევარში მეტი გოლი აღარ გასულა.

“ბარსელონამ” 3-ბურთიანი უპირატესობა მიიღო და ცალი ფეხით ჩემპიონთა ლიგის 1/2 ფინალშია.

საფრანგეთში ერთმანეთის წინაშე გასული წლის ჩემპიონთა ლიგის ფინალისტები “ლიონი” და გერმანული კლუბი “ვოლფსბურგი” წარსდგნენ.

მოქმედმა ჩემპიონმა “ლიონმა” საწყის 18 წუთში მოტოქის კარი 2-ჯერ აიღო.
11-ე წუთზე ფრანგული კლუბი ფორვარდმა ეუჟენია ლე სომერმა დააწინაურა.
7 წუთის შემდეგ ვენდი რენარმა სხვაობა ორამდე გაზარდა.

64-ე წუთზე სტუმართა გუნდმა ერთი გოლის გატანა მოახერხა. ალექსანდრა პოპის პასით 34 წლის ვეტერანმა შვედმა ფეხბურთელმა ნილა ფიშერმა იხეირა.

საბოლოოდ “ლიონმა” “ვოლფსბურგი” 2-1 დაამარცხა.
ერთი კვირის თავზე ეს გუნდები ერთმანეთს გერმანიაში დაუპირისპირდებიან და 1/2 ფინალისტის ვინაობას გაარკვევენ.
“ვოლფსბურგს” შანსი აქვს გასულ წელს ფინალში განცდილი 1-4 მარცხისთვის ღირსეული რევანში აიღოს და ჩემპიონთა ლიფა მოქმედი ჩემპიონის გარეშე დატოვოს.

ჩემპიონთა ლიგის განმეორებითი 1/4 ფინალური მატჩები 27 მარტს, გაიმართება.

“სლავია” (ჩეხეთი) 1:1 “ბაიერნი” (გერმანია)
62′ როლფო (1-0), 74′ სვიტკოვა (1-1),

ბარსელონა” (ესპანეთი) 3:0 “კვინერი” (ნორვეგია)
3’24’ დუგანი (1-0, 2-0), 38′ კალდენტეი პენ. (3-0),

ლიონი” (საფრანგეთი) 2:1 “ვოლფსბურგი” (გერმანია)
11′ ლო სომერი (1-0), 18′ რენარი (2-0), 64′ ფიშერი (2-1)

ჩემპიონთა ლიგის ბოლო 1/4 ფინალურ შეხვედრას დიდი ბრიტანეთის დედაქალაქი ლონდონი უმასპინძლებს.
ერთმანეთს “ჩელსი” და “პსჟ” დაუპირისპირდებიან.
მატჩი სტარტს 21 მარტს, 23:00 საათზე აიღებს.

0 კომენტარი
0

მსგავსი პუბლიკაციები

დატოვეთ კომენტარი