მთავარი საქართველოეროვნული ნაკრები ვლადიმირ ვაისი: ,,2020 წლის მარტისთვის ფორმის პიკში უნდა ვიყოთ და ისტორიული შანსი გამოვიყენოთ”

ვლადიმირ ვაისი: ,,2020 წლის მარტისთვის ფორმის პიკში უნდა ვიყოთ და ისტორიული შანსი გამოვიყენოთ”

ავტორი კახა მიხანაშვილი
64 ნახვა

ირლანდიისა და საქართველოს ეროვნული ნაკრებების მატჩის დასრულების შემდეგ გამართულ პრესკკონფერენციაზე საქართველოს საფეხბურთო ნაკრების მთავარმა მწვრთნელმა ვლადიმირ ვაისმა განვლილი შეხვედრის შესახებ კომენტარი გააკეთა.

ვლადიმირ ვაისის აზრით, ჩვენმა გუნდმა  განვითარება უნდა გავაგრძელოს, რათა 2020 წლის მარტს მზად შევხვდეთ და ისტორიული შანსი გამოვიყენოთ.

ვლადიმირ ვაისი: „პირველ რიგში ირლანდიის ნაკრებს გამარჯვებას ვულოცავ, მათ კარგი თამაში აჩვენეს. მეტოქემ პირველი ტაიმი ძალიან მაღალ ტემპში ჩაატარა. ამიტომ მოგვიწია სათამაშო სქემა 4-4-2, 4-3-3-ით შეგვეცვალა. ზუსტად შესრულებული საჯარიმო დარტყმით დავმარცხდით, ჩემს ფეხბურთელებს თამაშის წინ ვუთხარი, რომ ჰარიჰეინი და ბრეიდი სტანდარტულების დროს ძალიან სახიფათოები არიან. ვფიქრობ, რომ ჯარიმის შესრულების დროს, კედელი ცოტა შიგნით იყო და ჰარიჰეინმა შესანიშნავი გოლი გაგვიტანა.

რაც შეეხება მეორე ტაიმს, ჩემი აზრით, კარგად ვითამაშეთ, ორი ძალიან კარგი მომენტი გვქონდა, მაგრამ რენდოლფმა ორივეს მოგერიება მოახერხა. ვცადეთ, რომ ბოლო 15 წუთში კიდევ ერთხელ შეგვეცვალა სათამაშო სქემა და ქვილითაიას ოქრიაშვილი მივახმარეთ. უკვე მეორე შეხვედრაში მარცხენა მცველის შეცვლა გვიწევს, რაც ადვილი ნამდვილად არაა.

ირლანდიის ნაკრები ჯგუფის ლიდერია, თუმცა ეს მხოლოდ დასაწყისია. ჩვენ ორი შეხვედრა წავაგეთ, ეს რა თქმა უნდა ცუდია, მაგრამ ჯგუფის ორ ლიდერთან, შვეიცარიასთან და ირლანდიასთან დავმარცხდით. აღნიშნულ გუნდებთან ერთად ვფიქრობ, რომ დანიაც ჯგუფის ფავორიტია. ბრძოლა უნდა გავაგრძელოთ, ახალი გუნდის შენება გვიწევს ისეთი ახალგაზრდა მოთამაშეებით, როგორიც ჩაკვეტაძე, ხარაბაძე, გვილია, კიტეიშვილი და სხვები არიან. მაგალითად, კიტეიშვილი ორი წლის უკან საქართველოს ჩემპიონატში თამაშობდა და ევროპაში ახლახან გადავიდა. ის დიდ ფეხბურთში პირველ ნაბიჯებს დგამს, ეს ადვილი ნამდვილად არაა, თუმცა ნაბიჯ-ნაბიჯ სწორად ვითარდება. ჩვენ უნდა გავაგრძელოთ განვითარება, 2020 წლის მარტს მზად შევხვდეთ და ისტორიული შანსი გამოვიყენოთ.

ჩაკვეტაძე ტრავმირებულია და ეს რა თქმა უნდა, ძალიან დიდი დანაკლისია ჩვენთვის. არველაძე 21 წლის პერსპექტიული მოთამაშეა, რომელსაც ამ შესანიშნავ სტადიონზე თამაშის საშუალება ჰქონდა. მან თავის პოტენციალი  დაგვანახა, მაგრამ ამ დონეზე თამაში ადვილი არაა. სათამაშო პრაქტიკის პრობლემა აქვს ქვილითაიას, მან მძიმე ტრავმა გადაიტანა და „გენტში“ ახლა იწყებს თამაშს. მე მჯერა ჩემი გუნდის, მე მჯერა პირადად მისი. 2020 წლის მარტისთვის ფორმის პიკში უნდა ვიყოთ, რაც ყველაზე მთავარია ტრავმების გარეშე, რადგან ბელორუსიის წინააღმდეგ გასამართი შეხვედრა ქართული ფეხბურთისთვის ისტორიული იქნება.“ – განაცხადა მატჩისშემდგომ პრეკონფერენციაზე საქართველოს ნაკრების მთავარმა მწვრთნელმა.

საქართველოს ნაკრები ევროპის 2020 წლის შესარჩევი ტურნირის მორიგ მატჩს, 7 ივნისს, შინ, გიბრალტარის გუნდთან ჩაატარებს.

წყარო: საქართველოს ფეხბურთის ფედერაცია

0 კომენტარი
0

მსგავსი პუბლიკაციები

დატოვეთ კომენტარი