მთავარი საქართველოდიდი ათი “ბათუმი” დიდი 10-ის ფინალში გავიდა

“ბათუმი” დიდი 10-ის ფინალში გავიდა

ავტორი კახა მიხანაშვილი
29 ნახვა

საქართველოს სარაგბო ჩემპიონატის დიდი 10-ის შესარჩევ ფინალში ერთმანეთს რეგულარული ჩემპიონატის გამარჯვებული “ბათუმი” და მეორეადგილოსანი რუსთავის “ხარები” დაუპირისპირდნენ.

აჭარაში “ბათუმი არენაზე” გამართულ ორთაბრძოლაში მასპინძლებმა მეტოქეს ყველა სარაგბო კომპონენტში აჯობეს. ზღვისპირელებმა 32:10 გაიმარჯვეს და ფინალში თამაშის უფლება მოიპოვეს.

შეხვედრაში თავდაპირველად “ბათუმი” გუნდის ფულბეკის მამუკა ნინიძის გატანილი ჯარიმით 3-0 დაწინაურდა.

მე-13 წუთზე კი აჭარლებმა პირველი ლელო გაიტანეს.  ლელოს ავტორი მამუკა ნინიძე გახდა. მან გარდასახვაც ზუსტად შეასრულა 10-0.

გაშვებული ლელოს შემდეგ რუსთაველებიც გააქტიურდნენ. მათი აქტიურობა მე-20 წუთზე გატანილი ლელოთი დაგვირგვინდა.  მასპინძელთა ჩათვლის მოედანში ბურთი “ხარების” კვაჭმა ირაკლი ნატრიაშვილმა შეიტანა 10-5.

ქვემო ქართლელების სიხარული დიდხანს არ გაგრძელებულა. ბათუმელებმა 10-ქულიანი სტატუსკვო მალევე აღადგინეს. ლელო  სანდრო ქოიავამ  გაიტანა 15-5.

მშობლიური ქომაგების  შეძახილებით გამხნევებული მორაგბეები ორიოდ წუთში  წინ 17 ქულითაც გავიდნენ.  ამჯერად ლელო “ბათუმის” გუნდის ჰავბეკმა  ზურაბ თუთბერიძემ  დადო.  მამუკა ნინიძემ გარდასახვისას ბურთი ძელებს შორის მშვიდად გააძვრინა 22-5.

მეორე ტაიმში თამაშის სურათი არ შეცვლილა. “ბათუმი” მეტოქეს ისევ აღემატებოდა და ქულებსაც მეთოდურად აგროვებდა.

63-ე წუთზე რუსთაველებს რიგით მეოთხე ლელო  ანზორ სიჭინავამ გაუტანა.  გარდასახვის შესასრულებლად ბურთთან მისულმა მამუკა ნინიძე ამ საქმეს თავი იდეალურად გაართვა 32-5.

66-ე წუთზე კი “ხარების” ჰავბეკმა კობა ბუჯიაშვილმა ე.წ. პრესტიჟის ლელო დადო.

საბოლოოდ “ბათუმმა” “ხარებს” 32:10 სძლია და 12 მაისს, დაგეგმილ დიდი 10-ის ფინალში თამაშის უფლება მოიპოვა.  მან ამ გამარჯვებით გადამწყვეტი მატჩის საკუთარ კედლებში ჩატარების უფლებაც დაიბევა.

“ხარებს” კი ფინალში გასასვლელად ბრძოლა თბილისის “ლოკომოტივისა” და მარნეულის “არმაზს” შორის გამარჯვებულთან მოუწევს.

“ბათუმი” 32:10 “ხარები” (რუსთავი)

“ბათუმი”: 4 ლელო – ნინიძე, ქოიავა, თუთბერიძე, სიჭინავა
გარდასახვა: ნინიძე (3)
ჯარიმა: ნინიძე (2)

“ხარები”: 2 ლელო – ნატრიაშვილი, ბუჯიაშვილი

 

~

 

0 კომენტარი
0

მსგავსი პუბლიკაციები

დატოვეთ კომენტარი