მთავარი ჭიდაობაბერძნულ-რომაული გივი კარტოზიას იუბილისადმი მიძღვნილი ტურნირი ზურაბ დათუნაშვილის მხარდაჭერით ჩატარდა

გივი კარტოზიას იუბილისადმი მიძღვნილი ტურნირი ზურაბ დათუნაშვილის მხარდაჭერით ჩატარდა

249 ნახვა

11 მაისს, თბილისის ჭიდაობის ფედერაციის კუთვნილ დარბაზში, 2004-2006 წლებსა და 2007-2009 წლებში დაბადებულთა შორის ბერძნულ-რომაული სტილით ჭიდაობაში დედაქალაქის ღია პირველობა გაიმართა. ტურნირში მონაწილება 200-მდე ბავშვმა, 20 წონით კატეგორიაში მიიღო. შეჯიბრება ლეგენდარული ქართველი მოჭიდავის გივი კარტოზიას 90 წლის იუბილეს მიეძღვნა. მისი ინიციატორი და ორგანიზატორი თბილისის ჭიდაობის ფედერაციის გენერალური მდივანი გოჩა ჩორგოლიანი იყო, რომლის თქმითაც, ტურნირი ევროპის ორგზნის ჩემპიონის ზურაბ დათუნაშვილის მხარდაჭერით  გაიმართა.

გოჩა ჩორგოლიანი: ორ ასაკობრივ კატეგორიაში ჩავატარეთ თბილისის ღია პირველობა. შეჯიბრება მიეძღვნა გივი კარტოზიას 90 წლის იუბილეს. ახლა, 30 მაისს, უნდა მივიღოთ მონაწილეობა რაჭაში გასამართ სოსო ბერიშვილის სახელობის ტურნირზე, ამიტომ გუნდი უნდა გამოკვეთილიყო. თუმცა იმის გამო, რომ თბილისის ჭიდაობის ფედერაციას არ აქვს არანაირი დაფინანსება, არ გვქონდა სახსრები ამ ტურნირის ჩატარების. ზოგადად, რასაც ვაკეთებთ, ყველაფერს ჩვენი ხარჯით ვაკეთებთ ხოლმე. ამ ტურნირზე ჩვენი სახსრებით ბავშვებისთვის მხოლოდ სიგელების გადაცემა შეგვეძლო და ასეც ვაპირებდით, თუმცა გუნდების ტრენერებს აკრეფილი ჰქონდათ ე.წ. სასტარტო. ესაა საკმაოდ აპრობირებული მეთოდი იმ შეჯიბრებების ჩატარების, რომელსაც არ აქვს დაფინანსება. წლების განმავლობაში, უსახსრობის გამო რომ ვერ ტარდებოდა ტურნირები, ასე ვთქვათ ჭიდაობის “მამებმა”, ვინც აქამდე მოიტანა ჭიდაობა, მოიფიქრეს ეს ე.წ. სასტარტო და სწორედ ასე ტარდებოდა ტურნირები, მათ შორის საქართველოს ჩემპიონატიც, როდესაც ის არ ფინანსდებოდა, ახლა უკვე ფინანსდება და ეს პრობლემაც აღარ არის, ბუნებრივია.

ევროპის ორგზის ჩემპიონმა, ზურაბ დათუნაშვილმა, იცოდა, რომ ჩვენ ეს ფინანსური პრობლემა გვქონდა და ბავშვების დაჯილდოება და ტურნირის სხვა ხარჯები აიღო თავის თავზე, მწვრთნელებს ბავშვებისგან აგროვებული თანხა უკან დააბრუნებინა და შეჯიბრება მთლიანად თვითონ დააფინანსა, რითაც ძალიან გაგვახარა, ჩვენც, მშობლებიცა და მით უმეტეს, ბავშვები. ბავშვებისთვის განსაკუთრებული სტიმული იყო ამხელა სპორტსმენისგან ყურადღება, ვისგანაც მაგალითს იღებენ და შესაბამისად, უფრო მეტი მონდომებითა და მოტივაციით ჭიდაობდნენ. ჩვენც შევძელით ყველა ჩემპიონ-პრიზიორი მედლებით დაგვეჯილდოვებინა, ასევე გავეცით სპეციალური პრიზები დამსახურებულ მოღვაწეებზე, ჭიდაობაში გაწეული ღვაწლისთვის. მოკლედ, ზურას კეთილშობილურმა ჟესტმა გაგვახარა ყველა, გარდა ტრენერების გარკვეული ნაწილისა, რომელთაც ცოტა ეუხერხულათ, რადგან იციან, შესაძლოა, საქართველოს ჭიდაობის ეროვნული ფედერაციის პრეზიდენტისგან პრობლემები შეექმნათ, რადგან მათმა გუნდმა მიიღო დათუნაშვილის მიერ დაფინანსებულ ტურნირში მონაწილეობა. მოგეხსენებათ, ჭიდაობის ეროვნული ფედერაციის პრეზიდენტსა და ზურაბ დათუნაშვილს შორის როგორი სიტუაციაცაა.

თბილისის მერიისგან არ ფინანსდება დედაქალაქის ღია პირველობები? 

-თბილისის მერია აფინანსებს მხოლოდ გარკვეულ პროექტებს. ჩვენ უნდა დავწეროთ პროექტი, წარვადგინოთ და დედაქალაქის მერიამ განიხილოს და დააფინანსოს, ან არ დააფინანსოს. თუმცა დედაქალაქის სპორტის სამსახური არაფორმალურად სწორედ გეგა გეგეშიძეს ემორჩილება და მისი ნებართვის გარეშე არაფერს არ აკეთებს. თუ მან დართო ნება – დააფინანსებს, თუ არადა ჩვენს წერილებს არც კი განიხილავენ. ეს არის ძალიან უხეში კანონდარღვევა. გვიშლის უფლებამოსილების განხორციელებაში ხელს. გეგეშიძის სურვილის გამო, მწვრთნელები, რომლებსაც წარმატებული ბავშვები ჰყავთ საერთოდ ამოშალა მერიამ მწვრთნელთა დახმარების პროგრამიდან, ხოლო ზოგი ისეთია ამ პროგრამაში ჩასმული საერთოდ არც ერთი ბავშვი რომ არ ჰყავს. ჩვენს დარბაზშიც აბსოლუტურად ყველა მწვრთნელი ხელფასის გარეშე ავარჯიშებს ბავშვებს.

თბილისის ჭიდაობის ფედერაციის დარბაზში სტუმრობისას sporter.ge იმ ბავშვების მშობლებსაც ესაუბრა, რომლებიც ამ დარბაზში ვარჯიშობენ. როგორც აღმოჩნდა, ბავშვებს საკმაოდ რთულ პირობებში უწევთ მომზადება და ზოგადად დარბაზს ძალიან ბევრი პრობლემა აქვს, რომელთა შესახებ უფრო დაწვრილებით უახლოეს პერიოდში ახალ პუბლიკაციაში შემოგთავაზებთ.

0 კომენტარი
0

მსგავსი პუბლიკაციები

დატოვეთ კომენტარი