მთავარი მთავარი ნაცუ ბაშოს ნაკაბიზე ლიდერები ტოჩინოშინი და იოკოძუნა კაკურიუ დამარცხდნენ

ნაცუ ბაშოს ნაკაბიზე ლიდერები ტოჩინოშინი და იოკოძუნა კაკურიუ დამარცხდნენ

ავტორი კახა მიხანაშვილი
183 ნახვა

დღეს, იაპონიის დედაქალაქ ტოკიოში მიმდინარე ნაცუ ბაშოზე ნაკაბის ანუ სუპერტურნირის შუაწელის ბრძოლები გაიმართა.

სამწუხაროდ, მაისი ბაშოს ნაკაბი ქართველებისთვის უიღბლო გამოდგა.
ორივე ჩვენებურმა რიკიშიმ ორთაბრძოლები დასთმო.

მაკუუჩი დივიზიონში წლის მესამე სუპერტურნირზე პირველი მარცხი სეკივაკე ტოჩინოშინმა იწვნია.
ლევან გორგაძე მე-2 მაეგაშირა იაპონელ ენდოსთან უვატედაშინაგეს ილეთით დამარცხდა.

ტოჩინოშინს მიმდინარე ბაშოზე 7 მოგება და 1 წაგება გააჩნია.
ქართველს ოძეკის პრესტიჟული წოდების დასაბრუნებლად დარჩენილ 7 ბრძოლაში 3 გამარჯვება სჭირდება.

ხვალ, ლევან გორგაძე ნაცუ ბაშოს მე-9 ბრძოლას ტურნირზე ტრავმის შემდეგ დაბრუნებულ იაპონელ ოძეკ ტაკაკეიშოსთან ჩაატარებს.
დღეს, ტაკაკეიშომ ბულგარელ კომოსუბი აოიამასთან ჰატაკიკომით წააგო.

გამარჯვება მოიპოვა ოძეკმა ტაკაიასუმ. მან მე-4 მაეგაშირა ოკუნოუმი იორიკირის ილეთით დაამარცხა.

ოძეკი გოიედოსა და კომოსუბი მიტაკეუმის ორთაბრძოლა რანგით უფრო მაღალი წოდების მქონე რიკიშის გამარჯვებით დასრულდა.
გოიედომ მეტოქეს იორიკირით სძლია.

ტურნირის ერთადერთმა იოკოძუნამ მონღოლმა კაკურიუმ თანამემამულე მე-3 მაეგაშირა ტამავაშისთან ოშიდაშის ილეთით წააგო.

ხვალ, კაკურიუს წინაშე დოჰიოზე მე-3 მაეგაშირა იაპონელი ოკინოუმი დადგება.

ტურნირის ნაკაბის შემდეგ ნაცუ ბაშოს 7-1 ბალნსით ისევ სამი ლიდერი ქართველი სეკივაკე ტოჩინოშინი,  მონღოლი იოკოძუნა კაკურიუ და მე-8 მაეგაშირა იაპონელი ასანოიამა ჰყავს.

რანგით დაბალ ჯურიოს დივიზიონში გაგამარუს შიკონათი მოასპარეზე თეიმურაზ ჯუღელმა მიმდინარე ბაშოზე დაუმარცხებელ იაპონელ ტაკაგენჯისთან წააგო.

ქართველ გოლიათს ნაცუ ბაშოზე 5 მოგება და 3 მარცხი აქვს. მას კაჩი-კოშის ანუ დადებითი ბალანსის მოსაპოვებლად კიდევ 3 გამარჯვება ესაჭიროვება.

ხვალ, გაგამარუს მოწინააღმდეგე მონღოლი რიკიში 32 წლის აზომარიუ იქნება.

0 კომენტარი
0

მსგავსი პუბლიკაციები

დატოვეთ კომენტარი